Mumbai Crime : मुंबईच्या घाटकोपर परिसरात गुरुवारी रात्री घडलेल्या धक्कादायक हत्याकांडाने शहर हादरले आहे. उद्धव ठाकरे गटाच्या शिवसेनेचे कट्टर पदाधिकारी आणि सेवानिवृत्त रेल्वे लोको पायलट सुरेंद्र धोंडुराम पाचाडकर (६५) यांची किरकोळ धक्क्याच्या वादातून लोखंडी रॉडने डोक्यात वार करून हत्या करण्यात आली.
विक्रोळी पार्कसाईट परिसरातील रहिवासी असलेल्या पाचाडकर हे मधुमेह आणि किडनी आजाराने ग्रस्त होते. या घटनेने शिवसेना कार्यकर्त्यांत संतापाची लाट उसळली असून, पार्कसाईट आणि घाटकोपरमध्ये हळहळ व्यक्त केली जात आहे.
घाटकोपर रेल्वे स्टेशनजवळील सीजीएस कॉलनीच्या फुटपाथवर इवनिंग वॉकसाठी आलेले पाचाडकर हे नेहमीप्रमाणे फेरफटका मारत होते. यावेळी १९ वर्षीय अमन श्रीराम वर्मा या तरुणाने त्यांना धक्का दिला. या किरकोळ घटनेवरून दोघांमध्ये शाब्दिक भांडण सुरू झाले, जे लवकरच हाणामारीत बदलले.
संतापलेल्या अमनने जवळ पडलेली लोखंडी रॉड उचलली आणि पाचाडकर यांच्या डोक्यात प्रहार केला. गंभीर जखमी झालेल्या पाचाडकर खाली कोसळले. प्रत्यक्षदर्शींनी तात्काळ घटनास्थळावरून त्यांच्या सावत्र मुलगा अशोक साठे आणि आई शुभांगी यांना फोन केला. मात्र, उपचारासाठी खासगी रुग्णालयात नेल्यानंतर डॉक्टरांनी त्यांना मृत घोषित केले.
घाटकोपर पोलीस ठाण्यातील वरिष्ठ निरीक्षक संतोष जाधव यांच्या मार्गदर्शनाखाली सहायक निरीक्षक ज्ञानेश्वर खरमाटे यांच्या पथकाने तत्काळ तपास हाती घेतला. सुमारे ८० सीसीटीव्ही फुटेजचा छानणी करून आणि कसून चौकशी केल्यानंतर अवघ्या पाच तासांत आरोपी अमनला रमाबाई कॉलनीतून अटक करण्यात आली.
प्राथमिक तपासात लुटीच्या उद्देशाने हा गुन्हा असल्याचे निदर्शनास आले असून, घाटकोपरच्या ‘फर्निचर गली’ परिसरात ड्रग्स अॅडिक्ट्स आणि छिनेफरी करणाऱ्या गुंडगार्यांची सक्रियता वाढली असल्याचे पोलिस सूत्रांनी सांगितले. जोन-७ चे पोलीस उपायुक्त राकेश ओला यांनी घटनास्थळी पाहणी केली.
या घटनेमुळे मुंबई पोलिसांनी ‘फर्निचर गली’सारख्या संशयास्पद भागांमध्ये गस्त वाढवण्याचे आणि सीसीटीव्ही नेटवर्क मजबूत करण्याचे निर्देश दिले आहेत. पाचाडकर हे विक्रोळी पश्चिमेतील आनंदगड, त्रिवेणी सोसायटीत कुटुंबासह राहत होते. शिवसेनेकडून या हत्येला न्याय देण्याची मागणी करण्यात येत असून, पुढील तपास सुरू आहे.
