अहिल्यानगर : जिल्ह्यातील १२ नगरपरिषद व नगरपंचायतीच्या निवडणुकीत कोपरगाव, देवळाली (प्रवरानगर), नेवासा आणि पाथर्डी या चार ठिकाणी नगराध्यक्षपदाच्या उमेदवारांबाबत कोर्टात अपील प्रलंबित असल्याने मतदान प्रक्रिया पुढे ढकलण्यात आली आहे. याशिवाय, सात नगरसेवक पदांच्या उमेदवारांबाबतही कोर्टात अपील असल्याने त्या ठिकाणीही निवडणूक प्रक्रिया स्थगित करण्यात आली.
जिल्ह्यातील एकूण ११ नगरपरिषद व एका नगरपंचायतीच्या निवडणुका २ डिसेंबरला होण्याची शक्यता होती, ज्यात संगमनेर, शिर्डी, राहाता, राहुरी, श्रीरामपूर, शेवगाव, जामखेड, श्रीगोंदा, पारनेर, कर्जत यांचा समावेश आहे. मात्र, वरील चार ठिकाणी कोर्टातील प्रकरणांमुळे राज्य निवडणूक आयोगाने निवडणूक पुढे ढकलली. यामुळे जिल्ह्यातील शाळा व महाविद्यालयांना १ आणि २ डिसेंबरला सुट्टी जाहीर करण्यात आली असली तरी ढकललेल्या ठिकाणी ही सुट्टी मर्यादित राहील.
असा असेल निवडणूक प्रक्रियेचा नवीन कार्यक्रम
– माघार घेण्यासाठी अंतिम मुदत: १० डिसेंबर
– मतदान: २० डिसेंबर
– मतमोजणी: २१ डिसेंबर
या निवडणुकीत प्रादेशिक विकास, पायाभूत सुविधा आणि स्थानिक समस्या यावर उमेदवारांचा भर असला तरी कोर्टातील अपीलांमुळे प्रक्रिया लांबली. जिल्हा निवडणूक कार्यालयाने याबाबत सूचना जारी केली असून, उमेदवारांनी नवीन वेळापत्रकानुसार तयारी करावी, असे आवाहन केले आहे. उर्वरित आठ ठिकाणी २ डिसेंबरला मतदान होईल.
