Nashik family suicide latest updates Devla Taluka : नाशिक जिल्ह्यातील देवळा तालुक्यातील फुले माळवाडी गावात शनिवारी (३० नोव्हेंबर २०२५) सकाळी एक धक्कादायक घटना घडली. एकाच कुटुंबातील चार जणांनी सामूहिक आत्महत्या केल्याने परिसर हादरला आहे.
४० वर्षीय पुरुषाने गळफास घेतला असून, त्याची ३५ वर्षीय पत्नी व ८ वर्षीय मुलगी व २ वर्षीय मुलगा बेडवर मृत अवस्थेत आढळले. पोलिसांनी घटनास्थळी धाव घेत पंचनामा केला असून, मृतदेह पोस्टमार्टमसाठी सरकारी रुग्णालयात पाठवले आहेत. आत्महत्येचे नेमके कारण अज्ञात असून, तपास सुरू आहे.
नेमकं काय घडलं?
देवळा पोलीस स्टेशन अंतर्गत येणाऱ्या या गावात ही घटना घडली. स्थानिक स्वराज्य संस्थांच्या निवडणुकांमुळे राजकीय धुरळा उडत असतानाच ही घटना घडल्याने स्थानिकांच्या मनात भीती व शोकाची लाट उसळली आहे. देवळा पोलीस निरीक्षक, उपनिरीक्षक व पोलीस कर्मचारी घटनास्थळी पोहोचले असून, नाशिक विभागीय फॉरेन्सिक टीमनेही तपासासाठी मदत केली.
आजूबाजूच्या शेजाऱ्यांकडून चौकशी सुरू असून, कुटुंबाच्या आर्थिक, कौटुंबिक किंवा इतर समस्या होत्या का, याचा तपास सुरू आहे. या घटनेने गावकऱ्यांमध्ये शोककळा पसरली असून, पोलिसांनी आत्महत्येच्या वाढत्या घटनांबाबत जनजागृती करण्याचे आवाहन केले आहे. अधिक माहितीसाठी देवळा पोलिस स्टेशनशी संपर्क साधावा, अशी सूचना देण्यात आली आहे. तपासात नवीन माहिती समोर आल्यास अपडेट्स दिल्या जातील.
