पुणे: राष्ट्रवादी काँग्रेस अध्यक्ष आणि उपमुख्यमंत्री अजित पवार यांनी शरद पवार यांच्या पक्षातील खासदारांना आपल्याकडे वळवण्याचा प्रयत्न सुरू झाल्याची चर्चा राजकीय वर्तुळात सुरु आहे. राष्ट्रवादीचे प्रदेशाध्यक्ष खासदार सुनील तटकरे यांनी शरद पवार यांच्या सात खासदारांना संपर्क केल्याची माहिती मिळत आहे. या खासदारांची भेट घेऊन सोबत येण्याची ऑफर तटकरे यांनी दिली आहे. दरम्यान संपर्क झालेल्या सर्व सातही खासदारांनी सुनील तटकरे यांच्या ऑफर नकार दिल्याची माहिती देखील आहे. यानंतर राष्ट्रवादी काँग्रेस- शरदचंद्र पवार पक्षाच्या कार्यकारी अध्यक्षा सुप्रिया सुळे यांनी खासदार प्रफुल पटेल यांना फोन करत तटकरे यांनी केलेल्या कृतीबाबत नाराजी व्यक्त केली आहे. यामुळे पुन्हा एकदा महाराष्ट्राच्या राजकीय वर्तुळात चर्चांना उधाण आले आहे.
शरद पवार यांच्या पक्षातील खासदारांना आपल्याकडे वळवण्याची जबाबदारी ही अजित पवार यांच्याकडून सुनील तटकरे यांच्या खांद्यावर सोपवण्यात आलेली आहे.त्याचाच एक भाग म्हणून सुनील तटकरे यांनी सुप्रिया सुळे वगळता इतर सात खासदारांची भेट घेत त्यांना अजित पवारांसोबत येण्याची ऑफर दिली. तुम्ही सत्तेसोबत या, असे सुनील तटकरे यांनी या खासदारांना सांगितले. या भेटी स्वतंत्रपणे घेण्यात आल्याची माहिती समोर येत आहे. दरम्यान या भेटी आणि ऑफरबाबतची माहिती तुम्ही इतर कोणाला देऊ नका, असेही तटकरेंनी खासदारांना सांगितले. मात्र या सातही खासदारांनी या भेटीची माहिती शरद पवारांना आणि सुप्रिया सुळे यांना दिली. त्यानंतर खासदार सुप्रिया सुळे यांनी प्रफुल पटेल यांना फोन करून याप्रकरणी नाराजी व्यक्त केली. पुन्हा तुम्ही आमचा पक्ष फोडण्याचा प्रयत्न करत आहात का? अशी थेट विचारणा सुप्रिया सुळे यांनी प्रफुल पटेल यांच्याकडे केल्याची माहिती मिळत आहे. या सातही खासदारांनी सुनील तटकरे यांची ऑफर धुडकावल्याची माहिती आहे. एनडीए सरकारला अधिक स्थिरता मिळावी, यासाठी या सात खासदारांना आपल्याकडे वळवण्याचा प्रयत्न सुरू आहे.
