Myanmar Military Attack: म्यानमारच्या लष्कराने केलेल्या हवाई हल्ल्यात एका मोठ्या बंडखोर सशस्त्र दलाच्या नियंत्रणाखाली असलेल्या भागातील एक रुग्णालय उद्ध्वस्त झाले. या हल्ल्यात चौतीस रुग्ण आणि वैद्यकीय कर्मचारी ठार झाले. बुधवारी रात्री पश्चिमेकडील राखीन राज्यातील अरकान आर्मीचे वर्चस्व असलेल्या म्रौक-यू टाउनशिपमधील रूग्णालयावर हा हल्ला झाला त्यात अन्य ८० जण जखमी झाले. सत्ताधारी लष्कराने या भागात कोणत्याही हल्ल्याच्या बातमीला दुजोरा दिलेला नाही.
राखीनचे वरिष्ठ बचाव अधिकारी वाई हुन आंग यांनी सांगितले की, जेट विमानांनी रात्री ९:१३ वाजता दोन बॉम्ब टाकले, त्यापैकी एक हॉस्पिटलच्या रिकव्हरी वॉर्डमध्ये आणि दुसरा हॉस्पिटलच्या मुख्य इमारतीजवळ पडला. त्यांनी पुढे सांगितले की ते गुरुवारी सकाळी मदत देण्यासाठी रुग्णालयात पोहोचले आणि १७ महिला आणि १७ पुरुषांच्या मृत्यूची नोंद केली. बॉम्बने हॉस्पिटलच्या इमारतीचा बहुतांश भाग उद्ध्वस्त झाला. या स्फोटात रुग्णालयाजवळ उभ्या असलेल्या कार, टॅक्सी आणि सायकलींचेही नुकसान झाले.
दरम्यान, ज्यांच्याशी लष्कराचा कथित संघर्ष सुरू आहे ती अराकान आर्मी ही म्यानमार सरकारपासून स्वातंत्र्य मिळवण्यासाठी प्रयत्न करणाऱ्या राखीन वांशिक अल्पसंख्याक चळवळीची प्रशिक्षित सेना आहे. त्यांनी नोव्हेंबर २०२३ मध्ये राखीनमध्ये आक्रमण सुरू केले आणि धोरणात्मकदृष्ट्या महत्त्वाचे प्रादेशिक लष्कर मुख्यालय आणि राखीनच्या १७ पैकी १४ शहरे ताब्यात घेतली.
पूर्वी अराकान म्हणून ओळखले जाणारे राखीन हे २०१७ मध्ये म्यानमारच्या लष्कराने केलेल्या क्रूर बंडखोरीविरोधी मोहिमेचे ठिकाण होते, ज्यामुळे अंदाजे ७,४०,००० अल्पसंख्याक रोहिंग्या मुस्लिमांना सीमा ओलांडून बांगलादेशात पळून जावे लागले. बौद्ध राखीन आणि रोहिंग्या समुदायांमध्ये जातीय तणाव कायम आहे.
