Vinesh Phogat Comeback: भारताची अनुभवी आणि स्टार महिला कुस्तीपटू विनेश फोगट पुन्हा एकदा मॅटवर उतरण्यास सज्ज झाली आहे. पॅरिस ऑलिंपिक 2024 मधील धक्कादायक अपात्रतेनंतर भावनिक क्षणी तिने अचानक निवृत्तीची घोषणा केली होती. मात्र, काही महिन्यांच्या शांततेनंतर तिने पुन्हा परतण्याचा निर्णय घेतला असून तिचे पुढील लक्ष्य थेट लॉस एंजेलिस ऑलिंपिक 2028 आहे. पॅरिस 2024 मध्ये विनेश 50 किलो वजनी गटाच्या अंतिम फेरीत पोहोचली होती. पण स्पर्धेच्या आधी वजन 100 ग्रॅमने जास्त असल्यामुळे तिला नियमांनुसार बाहेर पडावे लागले. तीन वेळा ऑलिंपिक खेळूनही पदकाची संधी निसटल्याने ती भावनिक झाली आणि याच पार्श्वभूमीवर तिने निवृत्ती घेत असल्याची घोषणा केली होती.
‘मी परत येत आहे’; सोशल मीडियावर विनेशची घोषणा
एक्सवर पोस्ट करत तिने लिहिले की, तिला स्वतःपासून, संघर्षातून आणि मानसिक दडपणातून दूर जाण्याची गरज होती. तिने म्हटलं आहे की, ‘बराच काळ मला स्वतःलाही माहित नव्हते की पॅरिस माझा शेवट होता का. पहिल्यांदाच मी स्वतःला विश्रांती द्यायला शिकले. पण माझी कुस्तीची आवड कधीच संपली नाही.’ विनेशने पुढे लिहिले, आता मी नव्या ऊर्जेने, निर्भय मनाने LA28 कडे जात आहे. आणि यावेळी मी एकटी नाही… माझा मुलगाही या प्रवासात माझ्यासोबत असेल. तो माझा छोटा चीअरलीडर आहे.
— Vinesh Phogat (@Phogat_Vinesh) December 12, 2025
अपात्रता, अपील आणि संघर्ष
अपात्रतेनंतर विनेशने लवाद न्यायालयात अपील केले होते. चौकशी समिती स्थापन झाली, पण सुनावणी वारंवार पुढे ढकलली गेली आणि अखेर तिचे अपील फेटाळले गेले. या घटनेने तिच्या कारकिर्दीवर मोठा परिणाम झाला.
