Gautami Patil: बिग बॅास मराठीचे सहावे पर्व काही दिवसातच सुरू होणार आहे. मोठ्या सेलिब्रिटीसह बिग बॉस मराठी प्रेक्षकांच्या भेटीला येणार आहे. या नवीन पर्वाचा एक टीझरही प्रदर्शित झाला आहे. सहाव्या पर्वातील संभाव्य स्पर्धेकांची नावे समोर आली आहेत. या नावांमध्ये एक नाव खूप चर्चेत असते. ते म्हणजे महाराष्ट्राची लाडकी ‘सबसे कातील गौतमी पाटील’ बिग बॅासच्या घरात स्पर्धेक म्हणून सहभागी होणार असल्याचे गेल्या अनेक दिवसांपासून सांगितले जात होते, यावर आता गौतमीने स्वत: खुलासा केला आहे.
खरंतर गौतमी पाटील हे नाव अख्या महाराष्ट्राला परिचित आहे. तिच्या नृत्याने तिला मोठी लोकप्रियता मिळवून दिली असून, ती वेगवेगळ्या माध्यमातून प्रेक्षकांच्या भेटीला येत असते. लाइव्ह शो, चित्रपटातील आयटम नंबर्स, रिअॅलिटी शो, म्युझिक अल्बमध्ये ती झळकत आहे. त्यामुळे तिची लोकप्रियता वाढत असून, तिच्या चाहत्यांची संख्याही मोठी आहे. ती बिग बॅास मराठीच्या सहाव्या पर्वात स्पर्धेक म्हणून सहभागी होणार असल्याचे बोलले जात आहे.
सहाव्या पर्वामध्ये तिला पाहण्यासाठी चाहते आतुर असले तरी आपण तयार नसल्याचे तिने सांगितले आहे. यामुळे सुरू असलेल्या चर्चांना पूर्णविराम मिळाला आहे. त्यामुळे गौतमी या रियालिटी शोचा भाग होणार नसल्याचे स्पष्ट झाले आहे. नुकत्याच दिलेल्या एका मुलाखतीत तिने याविषयी खुलासा केला आहे. बिग बॉसच्या पाचव्या पर्वासाठीही विचारणा झाली होती. पण मी ती नाकारली. कारण मी तीन-चार दिवसांपेक्षा जास्त वेळ आईला सोडून राहूच शकत नाही, असे कारण गौतमीने दिले आहे.
असे असले तरी तिने या रियालिटी शोचे कौतुकही केले आहे. बिग बॉस हा खरं तर खूप मोठा शो आहे, तिथं गेल्यावर कलाकरांना मोठी लोकप्रियता मिळते, प्रसिद्धी मिळते. करिअरसाठीही हा शो महत्त्वाचा असतो, असे ती म्हणाली. लवकरच काही मराठी चित्रपटांमध्ये आणि गाण्यांच्या अल्बममध्ये गौतमी पाटील झळकणार आहे.
