Pune Crime: सिंहगड परिसरातील खानापूर भागात शुक्रवारी भरदिवसा एका धाडसी दरोड्याची घटना घडली. पाच सशस्त्र दरोडेखोरांनी पानशेत रस्त्यावरील ‘वैष्णवी ज्वेलर्स’ या दुकानावर हल्ला करत सुमारे एक कोटी रुपयांचे दागिने लुटले. या घटनेने संपूर्ण हवेली तालुक्यात खळबळ उडाली असून व्यापाऱ्यांमध्ये भीतीचे वातावरण आहे.
नेमकी घटना काय?
दरम्यान, शुक्रवारी दुपारी १२:३० च्या सुमारास, जेव्हा दुकानाचे मालक श्री. बाबर हे त्यांचा मुलगा आणि महिला कर्मचाऱ्यांसह दुकानात होते, तेव्हा दोन दुचाकींवरून पाच तोंडाला रुमाल बांधलेले तरुण तिथे आले. दुकानात शिरताच दरोडेखोरांनी हातात कोयते उपसून सर्वांना जीवे मारण्याची धमकी दिली. अत्यंत सराईतपणे या टोळीने दुकानातील काचेच्या कपाट फोडून त्यातील ७५ ते ८० तोळे सोन्याचे दागिने पिशव्यांत भरले. अवघ्या दोन मिनिटांच्या आत हे दरोडेखोर पानशेतच्या दिशेने पसार झाले.
सीसीटीव्हीमध्ये कैद झाला दरोड्याचा थरार
या घटनेचे सीसीटीव्ही फुटेज समोर आले असून, त्यात दरोडेखोरांचा हैदोस स्पष्ट दिसत आहे. काहींनी दागिने भरण्याचे काम केले, तर एक जण शस्त्राचा धाक दाखवून कर्मचाऱ्यांना जागेवरच रोखून धरताना दिसत आहे. यावरून दरोडेखोरांनी दुकानाची आधी ‘रेकी’ केली असावी, असा पोलिसांचा प्राथमिक अंदाज आहे.
हेही वाचा –
तपास आणि सुरक्षा प्रश्न
घटनेची माहिती मिळताच पोलिसांनी घटनास्थळी धाव घेतली. सध्या सीसीटीव्ही फुटेजच्या आधारे आरोपींच्या मार्गाचा माग काढला जात आहे. भरवस्तीत आणि वर्दळीच्या मार्गावर अशा प्रकारे सशस्त्र दरोडा पडल्याने खडकवासला आणि सिंहगड परिसरातील व्यापाऱ्यांच्या सुरक्षेचा प्रश्न पुन्हा एकदा गंभीर झाला आहे.
