Sanjay Raut : राज्यातील सत्ताधारी महायुतीमध्ये सध्या सर्व काही आलबेल नसल्याचे चित्र स्पष्ट होत आहे. उपमुख्यमंत्री अजित पवार यांनी पिंपरी-चिंचवडमधील भाजप नेत्यांवर ‘सत्तेचा उन्माद’ आणि ‘धमकावण्याचे राजकारण’ केल्याचा घणाघाती आरोप केल्याने राजकीय वर्तुळात भूकंप झाला आहे. अजितदादांच्या या पवित्र्यावरून आता शिवसेना (ठाकरे गट) खासदार संजय राऊत यांनी टोलेबाजी करत, दादांना थेट शरद पवारांच्या सावलीत परत येण्याचे आवाहन केले आहे.
‘सत्तेचा माज आलाय’, अजित पवारांचा स्वकीयांवरच प्रहार
पिंपरी-चिंचवडमधील एका सभेत बोलताना अजित पवारांनी भाजपवर तोफ डागली. आम्हीही दिल्लीपासून गल्लीपर्यंत सत्ता पाहिली, पण कधी सत्तेचा माज केला नाही. मात्र, आता उमेदवारी मागे घेण्यासाठी धमक्या दिल्या जात आहेत, अशा शब्दांत त्यांनी भाजप नेत्यांचे कान टोचले. महायुतीत एकत्र असतानाही दादांनी घेतलेल्या या भूमिकेमुळे सत्तेत ‘मांडीला मांडी’ लावून बसणाऱ्या नेत्यांमध्ये मोठी दरी असल्याचे समोर आले आहे. अजित पवारांच्या या टीकेवर प्रतिक्रिया देताना संजय राऊत यांनी दादांना चिमटा काढला. राऊत म्हणाले की, जर तुम्हाला भाजप सत्तेचा माज आलेला वाटत असेल, तर त्या सरकारमध्ये उपमुख्यमंत्री म्हणून कशाला बसताय? बाहेर पडा! इतकेच नव्हे तर राऊतांनी दादांना एक पाऊल पुढे जाऊन सल्ला दिला की, भाजपची साथ सोडा आणि मूळ राष्ट्रवादीत म्हणजेच शरद पवार यांच्याकडे परत या. शेवटी मूळ पक्ष त्यांचाच आहे.
‘वॉशिंग मशीन’ आणि भ्रष्टाचारावरून हल्लाबोल
भाजपच्या कार्यपद्धतीवर टीका करताना संजय राऊत यांनी पुन्हा एकदा ‘वॉशिंग मशीन’चा संदर्भ दिला. भाजप म्हणजे वॉशिंग मशीन आहे आणि अमित शहा हे वॉशिंग पावडर. भ्रष्टाचाराचे आरोप असलेले नेते या मशीनमध्ये गेले की स्वच्छ होऊन बाहेर पडतात, असे राऊत म्हणाले. पंतप्रधानांनी ७० हजार कोटींच्या घोटाळ्याचा आरोप केलेले अजित पवार आणि ‘आदर्श’ घोटाळ्याचे नाव असलेले अशोक चव्हाण आठ दिवसात भाजपसोबत कसे गेले? असा सवाल करत राऊतांनी देवेंद्र फडणवीस यांच्यावरही निशाणा साधला.
राजकीय अर्थ आणि संकेत
अजित पवारांची भाजपवरील ही नाराजी आणि संजय राऊतांनी दिलेली ‘घरवापसी’ची साद, यामुळे आगामी काळात महायुतीमध्ये मोठ्या घडामोडी घडण्याची शक्यता आहे. अजित पवार नवा मार्ग शोधत आहेत का? अशा चर्चा आता जोर धरू लागल्या आहेत.
