Team India Squad: भारतीय क्रिकेट नियामक मंडळाने (BCCI) न्यूझीलंडविरुद्ध होणाऱ्या आगामी ३ सामन्यांच्या एकदिवसीय (ODI) मालिकेसाठी भारतीय संघाची घोषणा केली आहे. या मालिकेचे सर्वात मोठे वैशिष्ट्य म्हणजे नियमित कर्णधार शुभमन गिल याचे संघात पुनरागमन झाले आहे. दुखापतीमुळे गिल दक्षिण आफ्रिकेविरुद्धच्या मालिकेला मुकला होता, परंतु आता तो पूर्णपणे तंदुरुस्त असल्याचे घोषित करण्यात आले असून तोच या मालिकेत भारतीय संघाचे नेतृत्व करेल. गिलच्या अनुपस्थितीत केएल राहुलने कर्णधारपदाची धुरा सांभाळली होती.
या संघात स्टार फलंदाज रोहित शर्मा आणि विराट कोहली यांचाही समावेश करण्यात आला आहे. सध्या हे दोन्ही खेळाडू उत्कृष्ट फॉर्ममध्ये असून दक्षिण आफ्रिकेविरुद्धच्या मालिकेत कोहलीने ३०२ धावा फटकावून ‘मॅन ऑफ द सीरिज’चा किताब पटकावला होता. दुसरीकडे, रोहित शर्मानेही सलग दोन अर्धशतके झळकावून आपला फॉर्म सिद्ध केला आहे. त्यामुळे न्यूझीलंडविरुद्धही या अनुभवी जोडीकडून मोठ्या धावांची अपेक्षा चाहत्यांना आहे. संघात ऋषभ पंत आणि श्रेयस अय्यर यांना स्थान मिळाले असले तरी श्रेयस अय्यरच्या उपलब्धतेबाबत अद्याप संभ्रम आहे. अय्यरला अद्याप बीसीसीआयच्या सेंटर ऑफ एक्सलन्सकडून फिटनेस प्रमाणपत्र मिळालेले नाही. मात्र, मालिका सुरू होण्यापूर्वी तो तंदुरुस्त होईल, अशी आशा निवडकर्त्यांनी व्यक्त केली आहे.
न्यूझीलंडविरुद्धची भारतीय टीम: शुभमन गिल (कर्णधार), रोहित शर्मा, विराट कोहली, केएल राहुल (यष्टीरक्षक), श्रेयस अय्यर (उपकर्णधार), वॉशिंग्टन सुंदर, रवींद्र जडेजा, मोहम्मद सिराज, हर्षित राणा, प्रसिद्ध कृष्णा, कुलदीप यादव, ऋषभ पंत (यष्टीरक्षक), नितीश कुमार रेड्डी, अर्शदीप सिंग, यशस्वी जयस्वाल.
मालिकेचे वेळापत्रक
न्यूझीलंडविरुद्धची ही मालिका ११ जानेवारी रोजी वडोदरा येथून सुरू होईल. मालिकेतील दुसरा सामना १४ जानेवारी रोजी राजकोट येथे, तर तिसरा आणि अंतिम सामना १८ जानेवारी रोजी इंदूरमध्ये खेळवला जाणार आहे. कर्णधार म्हणून शुभमन गिलचे पुनरागमन आणि रोहित-विराटची जोडी यामुळे क्रिकेट चाहत्यांमध्ये या मालिकेबद्दल मोठी उत्सुकता निर्माण झाली आहे.
