PMC Election: पुणे शहराच्या राजकारणात सध्या महापालिका निवडणुकांचे वारे वाहत असताना, भारतीय जनता पक्षाने प्रचारासाठी ‘ग्लॅमर’ आणि ‘विकास’ यांची सांगड घातली आहे. येत्या रविवारी (११ जानेवारी) पुण्यात एका विशेष संवाद कार्यक्रमाचे आयोजन करण्यात आले असून, राज्याचे मुख्यमंत्री देवेंद्र फडणवीस यात सहभागी होणार आहेत. विशेष म्हणजे, या सोहळ्यात मराठी आणि हिंदी सिनेसृष्टीतील लोकप्रिय अभिनेत्री गिरीजा ओक ही मुख्यमंत्र्यांची मुलाखत घेताना पाहायला मिळणार आहे.
मुख्यमंत्र्यांचा मेगा इव्हेंट, पुण्याच्या घराघरात पोहचणार आवाज
भाजपचे राज्य सरचिटणीस राजेश पांडे यांनी दिलेल्या माहितीनुसार, ‘संवाद पुणेकरांशी’ हा कार्यक्रम केवळ एका मैदानापुरता मर्यादित राहणार नाही. पुण्यातील सर्व प्रभाग कार्यालयांमध्ये अवाढव्य स्क्रीन लावून या कार्यक्रमाचे थेट प्रक्षेपण (Live Telecast) केले जाईल. एकाच वेळी तब्बल ५ लाख पुणेकर या संवादात डिजिटल माध्यमातून जोडले जाणार आहेत, असा भाजपचा दावा आहे.
हेही वाचा – Girija Oak Blue Saree: गिरीजा ओक निळ्या साडीमुळे रातोरात चर्चेत; नेमकी भानगड काय आहे?
‘नॅशनल क्रश’ गिरीजा ओक घेणार मुलाखत
सोशल मीडियावर आपल्या निळ्या साडीतील लूकने तरुणाईला भुरळ घालणारी ‘नॅशनल क्रश’ गिरीजा ओक आता राजकीय मैदानात मुलाखतकाराच्या भूमिकेत उतरणार आहे. याआधी अभिनेत्री तेजश्री प्रधान हिने ठाण्यात मुख्यमंत्र्यांशी संवाद साधला होता, आता तीच जबाबदारी पुणेकरांच्या वतीने गिरीजा पार पाडणार आहे. पुणेकरांच्या मनातील प्रश्न आणि शहराच्या समस्यांबाबत ती मुख्यमंत्र्यांना बोलते करणार आहे.
कार्यक्रमाचे महत्त्वाचे तपशील
विषय: ‘संवाद पुणेकरांशी’ (शहराचा सर्वांगीण विकास)
प्रमुख उपस्थिती: मुख्यमंत्री देवेंद्र फडणवीस
मुलाखतकार: अभिनेत्री गिरीजा ओक
दिनांक व वेळ: रविवार, 11 जानेवारी 2026 | सायंकाळी 7:00 वाजता
ठिकाण: शुभारंभ लॉन्स, डीपी रोड, एरंडवणे, पुणे
या सोहळ्याच्या निमित्ताने भाजप आपल्या ‘घर चलो’ या महासंपर्क अभियानाची सुरुवात करणार आहे. केवळ दोन दिवसांत पुण्यातील १० लाख घरांमध्ये भाजपचा निवडणूक जाहीरनामा म्हणजेच ‘संकल्पनामा’ पोहोचवण्याचे मोठे लक्ष्य पक्षाने ठेवले आहे. पुण्याचा सांस्कृतिक वारसा आणि आधुनिक विकास यांचा समतोल साधणारा ‘रोडमॅप’ मुख्यमंत्री या कार्यक्रमात मांडतील.
