पुणे : पुणे, पिंपरी-चिंचवड आणि पीएमआरडीए परिसराचा झपाट्याने होत असलेला विस्तार लक्षात घेता पुण्याचा विकास ‘ग्रोथ हब’ म्हणून केला जाणार असल्याची घोषणा मुख्यमंत्री देवेंद्र फडणवीस यांनी केली. सध्या महाराष्ट्राचे सकल उत्पन्न ५८० अब्ज डॉलर असून त्यामध्ये पुण्याचा वाटा ७० अब्ज डॉलर आहे. मात्र पुण्याची खरी क्षमता २८० अब्ज डॉलरपर्यंत असल्याचे त्यांनी स्पष्ट केले.
महापालिका निवडणुकीच्या पार्श्वभूमीवर आयोजित ‘पुणेकरांशी संवाद’ कार्यक्रमात फडणवीस यांनी पुढील दहा वर्षांचा विकास आराखडा मांडला. वाहतूक कोंडी, प्रदूषण, पाणीपुरवठा, घनकचरा व्यवस्थापन आणि नगरनियोजनावर भर दिला जाईल, असे त्यांनी सांगितले. पुणे ते मुंबईदरम्यान ‘ग्लोबल केपेबिलिटी सेंटर’चा (GCC) स्वतंत्र कॉरिडॉर उभारला जाणार असून त्यामुळे मोठ्या प्रमाणात रोजगारनिर्मिती होईल.
पुढील पाच वर्षांत पुणे महापालिकेमार्फत ४४ हजार कोटी रुपयांची गुंतवणूक करण्यात येणार असल्याचे त्यांनी जाहीर केले. मोफत मेट्रोच्या आश्वासनावर टीका करताना, पुणेकरांना मोफत सेवा नव्हे तर माफक दरात दर्जेदार सुविधा हव्या असल्याचेही मुख्यमंत्री फडणवीस यांनी ठामपणे सांगितले.
