मुंबई : आयटी सेवा क्षेत्रातील आघाडीची कंपनी विप्रोने शुक्रवारी आर्थिक वर्ष २६ साठीच्या तिसऱ्या तिमाहीचे निकाल जाहीर केले. कंपनीचा एकत्रित निव्वळ नफा ७ टक्क्यांनी घसरून ३११९ कोटी झाला. ही घट एक-वेळ रिस्ट्रक्चर चार्ज आणि कामगार संहितेची अंमलबजावणी यामुळे झाली.
कंपनीने गेल्या वर्षी याच कालावधीत ३३५३.८ कोटींचा निव्वळ नफा (इक्विटीधारकांना देय) नोंदवला होता. नवीन कामगार संहितेच्या अंमलबजावणीमुळे विप्रोला ३०२.८ कोटींचा एक-वेळ परिणाम दिसला. विप्रोचे प्रमुख प्रतिस्पर्धी असलेले टीसीएस, इन्फोसिस आणि एचसीएलटेक यांनीही आर्थिक वर्ष २६ साठीच्या त्यांच्या तिसऱ्या तिमाहीच्या निकालांमध्ये नवीन कामगार कायद्यांमुळे लक्षणीय परिणाम नोंदवले. टीसीएसला २१२८ कोटी, इन्फोसिसला १२८९ कोटी आणि एचसीएलटेकला ७१९ कोटींचा वैधानिक परिणाम सहन करावा लागला.
कंपन्यांच्या पुनर्रचना प्रक्रियेमुळे ऑक्टोबर-डिसेंबर तिमाहीत विप्रोला २६३ कोटींचा एक-वेळचा खर्चाचा फटका बसला आहे. विप्रोचा ऑपरेटिंग महसूल आर्थिक वर्ष २०२६ च्या तिसऱ्या तिमाहीत ५.५ टक्क्यांनी वाढून २३५५५.८ कोटी झाला, जो गेल्या वर्षी याच कालावधीत २२३१८.८ कोटी होता. तिमाही आधारावर, विप्रोचा नफा ३.९ टक्क्यांनी घसरला, तर महसूल ३.७ टक्क्यांनी वाढल्याचे समोर आले आहे.
