Baramati Crime: संपूर्ण महाराष्ट्र आपल्या लाडक्या नेत्याच्या, अजित पवार यांच्या निधनाने शोकसागरात बुडालेला असताना, बारामतीत एक अत्यंत संतापजनक प्रकार उघडकीस आला आहे. साहेबांना अखेरचा निरोप देण्यासाठी जमलेल्या अलोट गर्दीचा फायदा घेत निर्दयी चोरट्यांनी तब्बल १५ जणांच्या गळ्यातील सोन्याच्या साखळ्या ओरबाडल्या. एका बाजूला डोळ्यांतून अश्रू वाहत असताना दुसरीकडे चोरटे सोन्यावर हात साफ करत होते, या कृत्यामुळे बारामतीकरांमधून तीव्र संताप व्यक्त होत आहे.
२५ ते ३० लाखांचा ऐवज चोरीला
विद्या प्रतिष्ठानच्या मैदानावर पार पडलेल्या या अंत्यसंस्कारासाठी लाखो समर्थक जमले होते. या अलोट गर्दीत चोरट्यांच्या टोळीने नियोजित डल्ला मारला. प्राथमिक माहितीनुसार, चोरट्यांनी सुमारे २५ ते ३० लाख रुपये किमतीचे सोन्याचे दागिने लंपास केले आहेत. दुखात बुडालेल्या समर्थकांना आपली लूट झाल्याचे लक्षात येईपर्यंत चोरटे पसार झाले होते.
८ हजार पोलिसांचा कडक बंदोबस्त तरीही चोरी?
प्रशासनाने या सोहळ्यासाठी सुमारे ८,००० पोलिसांचा भलामोठा फौजफाटा तैनात केला होता. मात्र, पोलिसांच्या डोळ्यादेखत हा प्रकार घडल्याने सुरक्षा यंत्रणेवर प्रश्नचिन्ह उपस्थित केले जात आहे. असे असतानाही, काही सजग नागरिकांनी धाडस दाखवत काही संशयितांना रंगेहाथ पकडून पोलिसांच्या स्वाधीन केले.
पोलिसांकडून चौकशी सुरू
या प्रकरणी बारामती तालुका पोलिसांनी तात्काळ पावले उचलत गुन्हा दाखल केला आहे. पोलिसांनी याप्रकरणी मोहम्मद युनूस, राजकुमार आठवले, एजाज मिरावाले, मोहम्मद सिराज आणि बाळू बोत्रे यांच्यासह इतर दोन आरोपींविरुद्ध गुन्हा नोंदवला आहे. पोलिस सध्या या टोळीची कसून चौकशी करत असून चोरीला गेलेले सोन्याचे दागिने परत मिळवण्याचे मोठे आव्हान प्रशासनासमोर आहे.
