Traffic Challan Scam : सायबर गुन्हेगारांनी आता लोकांच्या भीतीचा फायदा घेण्यासाठी ‘डिजिटल चलान’ची नवी शक्कल लढवली आहे. वाहतूक नियमांचे उल्लंघन केल्याचे बनावट मेसेज पाठवून एका तरुणाला तब्बल ४ लाख ५ हजार रुपयांचा गंडा घालण्यात आला आहे. ‘NextGen mParivahan’ सारख्या अधिकृत वाटणाऱ्या नावाचा वापर करून ही फसवणूक केली जात असल्याने खळबळ उडाली आहे.
नेमकी कशी झाली फसवणूक?
हरित नावाच्या तरुणाला व्हॉट्सॲपवर एक मेसेज आला, ज्यावर परिवहन मंत्रालयाचा लोगो होता. त्यात ‘१००० रुपयांचे दंड थकीत आहे’ असे सांगून एक लिंक देण्यात आली होती. लिंकवर क्लिक करताच एक ‘APK’ फाईल (ॲप्लिकेशन) डाऊनलोड झाली. या ॲपमुळे तरुणाच्या फोनचे संपूर्ण नियंत्रण चोरट्यांकडे गेले. काही मिनिटांतच चोरट्यांनी त्याच्या ॲमेझॉन ई-वॉलेट आणि क्रेडिट कार्डचा ताबा घेतला. पाच मोठ्या व्यवहारांद्वारे ४.०५ लाख रुपये चोरून त्याचे ई-गिफ्ट कार्ड्स खरेदी करण्यात आले.
सायबर भामटे केवळ व्हॉट्सॲपच नाही, तर बनावट SMS आणि PDF चाही वापर करत आहेत. सायबर भामटे लायसन्स रद्द होईल किंवा अटकेची कारवाई होईल, अशी भीती घाततात. विश्वास संपादन करण्यासाठी वाहनाचा अर्धवट नंबर दिला जातो. तसेच दंड भरण्याच्या नावाखाली तुमच्या फोनमध्ये मालवेअर (Virus) घुसवले जाते, ज्यामुळे तुमचे सर्व पासवर्ड त्यांच्याकडे जातात.
फसवणूक टाळण्यासाठी ‘हे’ कराच
- अधिकृत पोर्टल: चलान भरण्यासाठी नेहमी अधिकृत सरकारी वेबसाइटचाच वापर करा.
- लिंक तपासा: ज्या लिंकच्या शेवटी .gov.in नाही, ती लिंक बनावट आहे असे समजा.
- APK फाईल्स: व्हॉट्सॲपवर आलेल्या कोणत्याही फाईल्स डाऊनलोड करू नका. सरकारी यंत्रणा कधीही व्हॉट्सॲपवर फाईल्स पाठवत नाहीत.
- QR कोड: दंड भरण्यासाठी कधीही अनोळखी व्यक्तीने पाठवलेला QR कोड स्कॅन करू नका.
फसवणूक झाल्यास काय करावे?
जर तुमची फसवणूक झाली, तर पहिले दोन तास (Golden Hours) अत्यंत महत्त्वाचे असतात. तातडीने १९३० या सायबर हेल्पलाईन नंबरवर कॉल करा. तसेच www.cybercrime.gov.in या पोर्टलवर तक्रार नोंदवा. याशिवाय, तातडीने बँकिंग व्यवहार आणि कार्ड्स ब्लॉक करा.
