मुंबई : अमेरिकेतील घडामोडींचा थेट परिणाम भारतातील आयटी कंपन्यांच्या शेअर्सवर जाणवला. बुधवारी शेअर बाजारातील व्यवहारादरम्यान प्रमुख आयटी शेअर्समध्ये घसरण झाली. यामध्ये टाटा ग्रुपचे टीसीएस आणि इन्फोसिस यांचा समावेश होता. इन्फोसिसच्या शेअर्समध्ये दोन वर्षांहून अधिक काळातील सर्वात मोठी घसरण दिसून आली.
बुधवारी कंपनीचा शेअर्स एकाच दिवसात ८ टक्क्यांनी घसरला, ज्यामुळे गुंतवणूकदारांचे मोठे नुकसान झाले. यामागे एआय कनेक्शन दिसून येते. सर्व आयटी शेअर्समध्ये घसरण होत असताना इन्फोसिसचा शेअर देखील उघडताच लगेचच कोसळला. इन्फोसिसचा शेअर १५७४ वर उघडला, जो त्याच्या मागील बंद १६५४.७० पेक्षा कमी होता आणि नंतर १५१०.१० वर घसरला, जो ८% पेक्षा जास्त घसरण दर्शवितो. त्यानंतरच्या व्यवहारात थोडीशी सुधारणा दिसून आली. इन्फोसिसच्या शेअर्सच्या घसरणीचा थेट परिणाम देशातील दुसऱ्या क्रमांकाच्या आयटी कंपनीच्या बाजार मूल्यावर झाला, ज्यामुळे शेअरमध्ये गुंतवणूक करणाऱ्यांची संपत्ती कमी झाली.
बुधवारी सुरुवातीच्या व्यवहारात इन्फोसिसच्या शेअर्समध्ये झालेली ही घसरण २१ मे २०२३ नंतरच्या या आयटी शेअरसाठी एका दिवसात झालेली सर्वात मोठी घसरण होती. त्या दिवशी बीएसईवर तो ९.४% ने घसरून १३०४.२४ च्या नीचांकी पातळीवर आला. बीएसईच्या आकडेवारीनुसार, कंपनीचे बाजार भांडवल (इन्फोसिस मार्केट कॅप) मागील बंदच्या तुलनेत ५४००० कोटींपेक्षा जास्त घसरले आणि ते ६.३१ लाख कोटींवर आले.
