Latur ZP Result: मराठवाड्याच्या राजकीय पटलावर आज एका नवीन पर्वाची सुरुवात झाली आहे. प्रस्थापित पक्षांच्या बालेकिल्ल्यात भगवे वादळ निर्माण करत राज ठाकरे यांच्या महाराष्ट्र नवनिर्माण सेनेने (मनसे) लातूर जिल्हा परिषदेत आपले खाते उघडले. रेणापूर तालुक्यातील पानगाव जिल्हा परिषद गटात डॉ. सुनील नागरगोजे यांनी मिळवलेला विजय हा या निवडणुकीतील सर्वात मोठा ‘उलटफेर’ मानला जात आहे.
पंचायत समितीतही ‘इंजिन’ सुसाट
मनसेची ही झेप केवळ जिल्हा परिषदेपुरती मर्यादित राहिली नाही, तर पंचायत समितीच्या रिंगणातही मनसेने आपले वर्चस्व दाखवून दिले आहे.
- कोस्टगाव गण: मनसेच्या श्रीदेवी गालफाडे यांनी विजय मिळवत प्रतिस्पर्ध्यांना धूळ चारली.
- पानगाव गण: मोनिका रवी सूर्यवंशी यांनी बाजी मारत पंचायत समितीवर मनसेचा झेंडा फडकवला.
प्रशासक राजचा अंत; लोकशाहीचा उत्सव
गेल्या ३६ महिन्यांपासून प्रलंबित असलेल्या या स्थानिक स्वराज्य संस्थांच्या निवडणुका अखेर मार्गी लागल्या आहेत. ७ फेब्रुवारीला पार पडलेल्या मतदानानंतर आज सकाळी १० वाजेपासून मतमोजणीला प्रारंभ झाला. ५९ जिल्हा परिषद आणि ११८ पंचायत समिती जागांसाठी झालेल्या या लढतीत काँग्रेस-भाजप यांसारख्या दिग्गज पक्षांना मनसेने दिलेली झुंज आगामी विधानसभा निवडणुकांसाठी सूचक मानली जात आहे. राज ठाकरेंचा करिश्मा आणि कार्यकर्त्यांची मेहनत यामुळेच लातूरमध्ये हे यश मिळाले, अशी भावना विजयी उमेदवारांनी व्यक्त केली आहे. या निकालामुळे लातूरच्या राजकारणात आता ‘मनसे फॅक्टर’ अधिक प्रबळ झाला आहे.
