Pune News: पर्यटनस्थळी सेल्फी काढण्याच्या नादात सुरक्षा धाब्यावर बसवणे एका तरुणाच्या जीवावर बेतले आहे. खंडाळा येथील प्रसिद्ध ‘सनसेट पॉइंट’वर निसर्ग न्याहाळताना पाय घसरून दरीत पडल्याने 26 वर्षीय प्रज्वल वसंत गिरी या पर्यटकाचा करुण अंत झाला. ही हृदयद्रावक घटना 8 फेब्रुवारी रोजी सायंकाळी घडली.
नेमकी घटना काय?
प्रज्वल आपल्या नातेवाईकांसह लोणावळा सहलीसाठी आला होता. हॉटेलमध्ये चेक-इन करण्यासाठी थोडा वेळ शिल्लक असल्याने, हा वेळ सत्कारणी लावण्यासाठी सर्वजण सायंकाळी 6.00 ते 6.30 च्या सुमारास खंडाळा टेकडीवर सूर्यास्त पाहण्यासाठी गेले. मात्र, तिथे सेल्फी घेण्याच्या प्रयत्नात प्रज्वलचा तोल गेला आणि तो थेट 70 ते 80 फूट खोल दरीत कोसळला.
तपास आणि कार्यवाही
या भीषण अपघातात प्रज्वलच्या डोक्याला आणि हाताला गंभीर मार लागल्याने त्याचा जागीच मृत्यू झाला. खोपोली पोलिसांनी घटनास्थळी धाव घेत पंचनामा पूर्ण केला असून, पुढील तपासासाठी हे प्रकरण लोणावळा शहर पोलिसांकडे सोपवण्यात आले आहे.
तीन आठवड्यांपासून बेपत्ता असलेल्या महिलेचा छिन्नविछिन्न मृतदेह सापडला
दरम्यान, दुसऱ्या एका घटनेत गडहिंग्लज तालुक्यातील महागाव ओढ्यात एका 40 वर्षीय महिलेचा मृतदेह छिन्नविछिन्न अवस्थेत सापडल्याने संपूर्ण जिल्हा हादरला आहे. सुनीता संजय केसरकर असे या मृत महिलेचे नाव असून, त्या गेल्या 24 दिवसांपासून बेपत्ता होत्या.
हत्येचा संशय बळावला
सुनीता केसरकर यांचा मृतदेह शिर नसलेल्या (विनामुंडके) अवस्थेत आढळल्याने ही हत्या असावी, असा प्राथमिक संशय पोलिसांनी व्यक्त केला आहे. भडगाव येथील रहिवासी असलेल्या सुनीता या तीन आठवड्यांपूर्वी बेपत्ता झाल्या होत्या. बुधवारी त्यांचा मृतदेह आढळल्यानंतर ग्रामीण भागात दहशतीचे वातावरण निर्माण झाले आहे. या अमानुष कृत्यामागचा नेमका हेतू काय होता, याचा तपास पोलीस करत आहेत.
