नवी दिल्ली : सध्या अनेक सोशल मीडिया अॅप्स सुरु आहेत. त्यात व्हॉट्सअॅपचा वापर सर्वाधिक केला जात आहे. इन्स्टंट मेसेजिंग ॲपमध्ये एक बहुप्रतिक्षित नवीन फीचर जोडण्यात आले आहे. याला नॉईज कॅन्सलेशन (Noise Cancellation) म्हटले जात आहे. जे कॉल दरम्यान आजूबाजूचा आवाज कॉलरपर्यंत पोहोचण्यापासून रोखते.
वेबेटाइन्फोच्या (Wabetainfo) मते, हे फीचर सध्या बीटा व्हर्जनमध्ये उपलब्ध आहे. या फीचरद्वारे कॉलिंगचा अनुभव सुधारण्याचे व्हॉट्सॲपचे उद्दिष्ट आहे. अँड्रॉइड स्मार्टफोन्ससोबतच, हे फीचर व्हॉट्सॲप वेबवर देखील उपलब्ध होईल. कंपनीने गेल्या महिन्यात व्हॉट्सॲप वेबसाठी व्हॉइस आणि व्हिडिओ कॉलिंग फीचर लाँच केले होते. व्हॉट्सॲप बऱ्याच काळापासून कॉलिंगचा अनुभव सुधारण्यासाठी काम करत आहे. हे फीचर केवळ व्हॉट्सॲप वेबपुरते मर्यादित नाही; ते अँड्रॉइड ॲपवरही काम करते.
रिपोर्ट्सनुसार, प्ले स्टोअरवर उपलब्ध असलेल्या व्हॉट्सॲप बीटा अँड्रॉइड 2.26.11.8 अपडेटमध्ये हे नवीन फीचर, म्हणजेच बिल्ट-इन नॉईज कॅन्सलेशन, आढळून आले आहे. रिपोर्टमध्ये Noise Cancellation फीचर कसे दिसेल याचे स्क्रीनशॉट्सही शेअर केले आहेत. स्क्रीनशॉट्सवरून असे दिसून येते की, कॉल चालू असताना, वापरकर्त्यांना नॉईज कॅन्सलेशन फीचर शोधण्यासाठी वर स्क्रोल करावे लागेल, ज्यासाठी एक टॉगल चालू करावा लागेल.
