Nagapur Crime News : नागपूरच्या हिंगणा परिसरात एक धक्कादायक घटना समोर आली आहे. डीएनडी हाइट्समध्ये राहणाऱ्या २३ वर्षीय विध्येश्वरी आपटे या नर्सिंगच्या विद्यार्थिनीने आत्महत्या केल्याने परिसरात खळबळ उडाली आहे. विशेष म्हणजे, तिने आत्महत्येपूर्वी आपल्या बॉयफ्रेंडला व्हिडिओ कॉल केल्याची माहिती समोर येत आहे.
मिळालेल्या माहितीनुसार, विध्येश्वरी ही आकार नर्सिंग कॉलेजमध्ये अंतिम वर्षाची विद्यार्थिनी होती. ती मैत्रिणींसोबत फ्लॅटमध्ये राहत होती. घटनेच्या दिवशी मैत्रिणी पदवीदान कार्यक्रमाला गेल्या असताना ती घरी एकटीच होती. याचदरम्यान तिने गळफास घेत आत्महत्या केली.
दोन दिवसांपूर्वी बॉयफ्रेंडचे दुसऱ्या तरुणीसोबत लग्न झाल्यामुळे ती मानसिक तणावात होती, अशी प्राथमिक माहिती आहे. या नैराश्यातूनच तिने टोकाचा निर्णय घेतल्याची चर्चा आहे.
घटनेची माहिती मिळताच पोलिसांनी घटनास्थळी धाव घेतली असून मृतदेह शवविच्छेदनासाठी पाठवण्यात आला आहे. आत्महत्येचे नेमके कारण शोधण्यासाठी पोलिसांकडून पुढील तपास सुरू आहे.
