Kalpana Kharat Lookout Notice: महिलांचे लैंगिक शोषण आणि आर्थिक फसवणूक प्रकरणातील मुख्य आरोपी भोंदू बाबा अशोक खरात याच्या अडचणीत वाढ झाली असून, आता त्याच्या कुटुंबावरही कायद्याचा फास आवळला जात आहे. खरातची पत्नी कल्पना खरात हिच्याविरुद्ध शिर्डी पोलिसांनी ‘लुकआऊट’ नोटीस (Lookout Notice) जारी केली आहे. यामुळे तिला आता देशाबाहेर पळून जाणे अशक्य झाले असून सर्व विमानतळांवर तिची माहिती प्रसारित करण्यात आली आहे.
सावकारी पाश आणि फसवणुकीचा गुन्हा
अशोक खरात केवळ आध्यात्मिक भोंदूपणाच नाही, तर बेकायदेशीर सावकारीचा व्यवसायही करत होता. शिर्डीतील रावसाहेब गोंदकर या शेतकऱ्याला व्याजाच्या जाळ्यात ओढून त्यांची 4 एकर जमीन हडप केल्याचा आरोप खरात दांपत्यावर आहे. याप्रकरणी खरातसह त्याची पत्नी कल्पना आणि इतर तीन मध्यस्थांविरुद्ध शिर्डी पोलीस ठाण्यात फसवणूक व सावकारी अधिनियमांतर्गत गुन्हा दाखल झाला आहे.
कल्पना खरात फरार; पोलिसांची कडक कारवाई
गुन्हा दाखल झाल्यापासून कल्पना खरात ही पोलिसांना गुंगारा देऊन फरार झाली आहे. यापूर्वी अशोक खरातनेही परदेशात पळून जाण्याचा प्रयत्न केला होता, जो पोलिसांनी हाणून पाडला. त्याच धर्तीवर कल्पना खरात देखील विदेशी प्रवासाचा आधार घेऊ शकते, ही शक्यता ओळखून पोलिसांनी तातडीने लुकआऊट नोटीस काढली आहे.
या प्रकरणातील इतर आरोपी
जमीन बळकावल्याच्या या प्रकरणात खरात दांपत्यासोबतच अरविंद बावके, किरण सोनावणे आणि अशोक तांबे यांच्यावरही गुन्हे नोंदवण्यात आले आहेत. सावकारी पाशात ओढून सर्वसामान्यांच्या जमिनी बळकावण्याचे मोठे रॅकेट खरात चालवत असल्याचे तपासात समोर येत आहे.
