Pune Accident: पुणे-बेंगळुरू राष्ट्रीय महामार्गावरील कात्रज नवीन बोगदा परिसरात पुन्हा एकदा भीषण अपघाताची घटना घडली आहे. जांभुळवाडी दरी पुलावर दोन अवजड ट्रेलर एकमेकांना धडकल्याने झालेल्या या अपघातात क्रेनचा लोखंडी भाग थेट केबिनमध्ये घुसल्याने चालक आणि क्लिनर गंभीर जखमी झाले आहेत.
भीषण धडक; केबिनचा चक्काचूर
मिळालेल्या माहितीनुसार, दोन्ही ट्रेलर क्रेनचे अवजड सुटे भाग घेऊन कात्रज बोगद्याकडून नवले पुलाच्या दिशेने जात होते. या मार्गावरील तीव्र उतारावर पाठीमागून येणाऱ्या ट्रेलरच्या चालकाचे वाहनावरील नियंत्रण सुटले आणि त्याने पुढच्या ट्रेलरला जोरदार धडक दिली. ही धडक इतकी वेगवान होती की, पाठीमागच्या ट्रेलरवर असलेला क्रेनचा वजनदार लोखंडी भाग वेगामुळे सरकला आणि थेट चालकाच्या केबिनमध्ये घुसला. यामुळे केबिनचा अक्षरशः चुराडा झाला असून मोठी जीवितहानी टळली असली तरी चालक-क्लिनर जखमी झाले आहेत.
‘ब्लॅक स्पॉट’वर पुन्हा अपघात
कात्रज बोगदा ते नवले पूल हा टप्पा वाहनचालकांसाठी अत्यंत धोकादायक मानला जातो. या भागातील तीव्र उतारामुळे अनेकदा वाहनांचे ब्रेक निकामी होतात किंवा वेग नियंत्रित करणे कठीण जाते. या अपघातातील दोन्ही वाहनांमध्ये क्रेनचे जड पार्ट्स असल्याने उतारावर त्यांचा वेग वाढला असावा, असा प्राथमिक अंदाज वर्तवण्यात येत आहे.
बचावकार्य आणि वाहतूक कोंडी
अपघाताची माहिती मिळताच महामार्ग पोलीस आणि बचाव पथकाने घटनास्थळी धाव घेतली. जखमींना तातडीने रुग्णवाहिकेद्वारे जवळच्या रुग्णालयात हलवण्यात आले आहे. क्रेनच्या साहाय्याने अपघातग्रस्त ट्रेलर बाजूला करण्याचे काम युद्धपातळीवर करण्यात आले. या घटनेमुळे महामार्गावरील वाहतुकीचा वेग काही काळ मंदावला होता. तीव्र उतारावर वाहन चालवताना वेगावर मर्यादा ठेवण्याचे आवाहन प्रशासनाकडून पुन्हा एकदा करण्यात आले आहे.
