Buldhana Crime: बदलापूर प्रकरणाची जखम ताजी असतानाच, बुलढाणा जिल्ह्यातून माणुसकीला काळिमा फासणारी एक घटना समोर आली आहे. शाळेच्या पवित्र मंदिरात ज्ञान देणाऱ्या एका ५८ वर्षीय शिक्षकाने तिसरीत शिकणाऱ्या नऊ वर्षांच्या चिमुकलीवर लैंगिक अत्याचार केल्याचा धक्कादायक प्रकार घडला आहे. या नराधम शिक्षकाच्या कृत्यामुळे संतप्त झालेल्या शेकडो ग्रामस्थांनी शाळेवर चाल करून त्याला चांगलाच चोप दिला.
नेमकी घटना काय?
मेहकर तालुक्यातील लोणी गवळी येथील प्राथमिक शाळेत मंगळवारी सकाळी १०:३० च्या सुमारास ही संतापजनक घटना घडली. महादेव आत्माराम मानतोडे असे या आरोपी शिक्षकाचे नाव आहे. या नराधमाने चिमुकलीसोबत गैरकृत्य केल्याची माहिती वाऱ्यासारखी गावात पसरली. त्यानंतर संतापलेल्या महिला आणि पुरुषांच्या जमावाने शाळेला वेढा घातला आणि आरोपीला जाब विचारत मारहाण केली.
पोलीस आणि ग्रामस्थांमध्ये ३ तास तणाव
घटनेची माहिती मिळताच डोनगाव पोलीस घटनास्थळी दाखल झाले. मात्र, संतप्त ग्रामस्थ आरोपीला पोलिसांच्या ताब्यात देण्यास तयार नव्हते. सुमारे तीन तास शाळेच्या परिसरात तणावाचे वातावरण होते. अखेर पोलिसांनी गावकऱ्यांची समजूत काढल्यानंतर आरोपीला पोलीस ठाण्यात हलवण्यात आले.
निवृत्तीला दीड महिना उरला असताना कृत्य
विशेष म्हणजे, आरोपी महादेव मानतोडे हा येत्या ३१ मे रोजी सेवानिवृत्त होणार होता. सेवेचा काळ संपायला अवघा दीड महिना बाकी असताना, वयोवृद्ध शिक्षकाने केलेल्या या नीच कृत्यामुळे शिक्षक आणि विद्यार्थ्यांच्या पवित्र नात्याला तडा गेला आहे.
