Parth Pawar: राष्ट्रवादी काँग्रेसचे तरुण नेते पार्थ पवार यांच्या राजकीय प्रवासातील एक महत्त्वाचा टप्पा आज गाठला गेला. दिवंगत माजी उपमुख्यमंत्री अजित पवार यांचे सुपुत्र पार्थ पवार यांनी आज (९ एप्रिल २०२६) राज्यसभेचे सदस्य म्हणून अधिकृत शपथ घेतली. संसदेच्या वरिष्ठ सभागृहात पाऊल ठेवताना पार्थ पवारांनी आपल्या वडिलांच्या स्मृतींना दिलेली मानवंदना आज चर्चेचा विषय ठरली.
पार्थ पवारांच्या पेहरावावर खिळल्या सर्वांच्या नजरा
आजच्या शपथविधी सोहळ्यात सर्वांच्या नजरा पार्थ पवारांच्या पेहरावावर खिळल्या होत्या. पार्थ यांनी यावेळी हुबेहूब अजित दादांच्या शैलीतील गुलाबी रंगाचे जॅकेट परिधान केले होते. अजित पवार आपल्या राजकीय कारकिर्दीत अशाच वैशिष्ट्यपूर्ण जॅकेटसाठी ओळखले जायचे. वडिलांच्या वारशाची आणि त्यांच्या कामाच्या पद्धतीची आठवण करून देणारा हा पेहराव पार्थ यांच्या राजकीय वाटचालीत वडिलांचे छत्र सदैव सोबत असल्याचा संदेश देऊन गेला. या भावनिक पेहरावामुळे राजकीय वर्तुळात मोठी चर्चा रंगली आहे.
दिल्लीत राष्ट्रवादीचा उत्साह
पार्थ पवार दिल्लीच्या राजकारणात सक्रिय झाल्याने राष्ट्रवादी काँग्रेसच्या कार्यकर्त्यांमध्ये आनंदाचे वातावरण आहे. त्यांच्या स्वागतासाठी दिल्लीतील महत्त्वाच्या चौकांमध्ये भव्य बॅनर लावण्यात आले होते. अजित पवारांच्या निधनानंतर पक्षाने पार्थ पवारांवर दाखवलेला हा विश्वास आगामी काळात पक्षाला नवीन दिशा देणारा ठरेल, अशी भावना कार्यकर्त्यांनी व्यक्त केली.
वडिलांचा वारसा पुढे नेण्याचे आव्हान
अजित पवारांच्या निधनामुळे निर्माण झालेली पोकळी भरून काढण्यासाठी पार्थ पवार आता राष्ट्रीय राजकारणातून आपली छाप पाडणार आहेत. केवळ पेहरावातूनच नव्हे, तर कृतीतूनही ते वडिलांचा वारसा समर्थपणे पुढे नेणार असल्याचा विश्वास समर्थकांकडून व्यक्त केला जात आहे. राज्यसभेच्या या शपथविधीमुळे राष्ट्रवादी काँग्रेसला आता दिल्लीत एक तरुण आणि आक्रमक चेहरा मिळाला आहे.
