Ladki Bahin Yojana eKYC Deadline: मुख्यमंत्री माझी लाडकी बहीण’ योजनेच्या लाभार्थ्यांसाठी राज्य सरकारकडून एक आनंदाची बातमी समोर आली आहे. ज्या महिलांना तांत्रिक अडचणींमुळे किंवा इतर कारणांमुळे अद्याप E-KYC प्रक्रिया पूर्ण करता आली नाही, त्यांच्यासाठी सरकारने मुदतवाढ जाहीर केली आहे. आता लाभार्थी महिलांना ३० एप्रिल २०२६ पर्यंत आपले केवायसी अपडेट करता येणार आहे.
का वाढवण्यात आली मुदत?
यापूर्वी E-KYC पूर्ण करण्याची अंतिम तारीख ३१ मार्च २०२६ ही होती. मात्र, शेवटच्या टप्प्यात सर्व्हरवर आलेला ताण आणि कागदपत्रांची पूर्तता करताना महिलांना येणाऱ्या अडचणी लक्षात घेता, महिला व बालविकास मंत्री अदिती तटकरे यांनी ही मुदत एक महिन्याने वाढवण्याचा निर्णय घेतला आहे. यामुळे राज्यातील हजारो प्रलंबित अर्जांना आता मंजुरी मिळण्याचा मार्ग मोकळा झाला आहे.
बोगस लाभार्थ्यांना चाप लावण्यासाठी ‘KYC’ चा अट्टहास
राज्य सरकारने ही योजना सुरू केल्यानंतर काही महत्त्वाचे निरीक्षणे नोंदवली होती:
- उत्पन्नाची अट: ही योजना वार्षिक २.५ लाख रुपयांपेक्षा कमी उत्पन्न असलेल्या कुटुंबातील महिलांसाठी मर्यादित आहे.
- अपात्र लाभार्थी: अनेक सरकारी कर्मचारी महिला आणि निकषात न बसणाऱ्या व्यक्तींनीही या योजनेचा लाभ घेतल्याचे समोर आले होते.
- पारदर्शकता: केवळ पात्र आणि गरजू महिलांनाच दरमहा १५०० रुपये मिळावेत, या उद्देशाने सरकारने E-KYC बंधनकारक केले आहे. यामुळे बोगस लाभार्थी प्रणालीतून बाहेर काढले जाणार आहेत.
आतापर्यंतची आकडेवारी आणि आव्हाने
योजनेच्या अंमलबजावणीदरम्यान आतापर्यंत सुमारे १.७ कोटी महिलांनी आपली E-KYC प्रक्रिया यशस्वीरीत्या पूर्ण केली आहे. मात्र, मध्यंतरीच्या काळात कौटुंबिक माहिती भरताना (उदा. कुटुंबात सरकारी नोकरी आहे की नाही) झालेल्या चुकांमुळे अनेकांचे हप्ते थांबले होते. अशा महिलांना आपल्या चुका दुरुस्त करण्यासाठी आणि ज्यांचे केवायसी अद्याप अपूर्ण आहे, त्यांना ही ३० एप्रिलपर्यंतची शेवटची संधी देण्यात आली आहे. जर तुमचे १५०० रुपयांचे हप्ते तांत्रिक कारणास्तव थांबले असतील, तर तात्काळ ३० एप्रिलपूर्वी जवळच्या केंद्रावर जाऊन किंवा ऑनलाइन पोर्टलद्वारे आपले E-KYC पूर्ण करून घ्यावे, जेणेकरून योजनेचा लाभ अखंडित सुरू राहील.
