Pune Crime: अनैतिक संबंधांच्या मोहात पडलेल्या एका मातेने आपल्या पोटच्या ६ वर्षांच्या मुलाचा प्रियकराच्या मदतीने जीव घेतल्याची अंगावर शहारे आणणारी घटना समोर आली आहे. पुणे जिल्ह्यातील कुरुळी (ता. खेड) येथे ही क्रूर घटना घडली असून, आरोपी महिलेने खुनाचा बनाव रचून गुन्ह्यावर पांघरूण घालण्याचा प्रयत्न केला होता, मात्र नातेवाईकांच्या सतर्कतेमुळे हे हत्याकांड उघडकीस आले.
बाथरूममध्ये दिला मृत्यूचा ठका
पोलिसांनी दिलेल्या माहितीनुसार, अवेज मेहबूब शेख (वय ६) असे मृत मुलाचे नाव आहे. आरोपी बसरीन मेहबूब शेख हिचे राम विनायक कजेवाड याच्याशी प्रेमसंबंध होते. या संबंधांमध्ये अवेज अडथळा ठरत असल्याने त्यांनी त्याला संपवण्याचा कट रचला. ४ एप्रिलच्या रात्री अवेजला बाथरूममध्ये नेऊन बादलीतील पाण्यात त्याचे तोंड दाबून आणि डोके भिंतीवर आपटून त्याची निर्घृण हत्या करण्यात आली.
हृदयविकाराचा बनाव अन् उघड झालेलं बिंग
हत्येनंतर आरोपी महिलेने अवेजचा मृतदेह बीड जिल्ह्यातील धर्मापुरी या मूळ गावी नेला. तिथे तिने मुलाचा मृत्यू ‘हृदयविकाराच्या झटक्याने’ झाल्याची खोटी माहिती नातेवाईकांना दिली. मात्र, मुलाच्या शरीरावरील खुणा पाहून नातेवाईकांना संशय आला आणि त्यांनी तात्काळ पोलिसांशी संपर्क साधला. शवविच्छेदन अहवालात अवेजचा मृत्यू पाण्यात बुडाल्याने झाल्याचे स्पष्ट होताच पोलिसांनी खाक्या दाखवताच बसरीनने आपला गुन्हा कबूल केला.
आरोपीला कोठडी, प्रियकर फरार
या प्रकरणी पोलिसांनी बसरीन शेख हिला अटक केली असून न्यायालयाने तिला १३ एप्रिलपर्यंत पोलीस कोठडी सुनावली आहे. या गुन्ह्यातील मुख्य सूत्रधार आणि बसरीनचा प्रियकर राम कजेवाड हा सध्या फरार असून पोलीस त्याचे शोध घेत आहेत. दक्षिण महाळुंगे पोलीस या प्रकरणाचा अधिक तपास करत असून, या घटनेमुळे खेड तालुक्यासह बीड जिल्ह्यात मोठी खळबळ उडाली आहे.
