इंदापूर: येथील निरा भीमा सहकारी सहकारी साखर कारखान्याची सन २०२५-२६ ते २०३०-३१ ची पंचवार्षिक निवडणूक संस्थापक व राष्ट्रीय सहकारी साखर कारखाना महासंघाचे अध्यक्ष हर्षवर्धन पाटील यांच्या नेतृत्वाखाली बिनविरोध झाली असून सलग पाचव्यावेळी ही परंपरा कायम राहिली आहे.
या कारखान्याच्या स्थापनेपासूनच्या २५ वर्षांत सर्व निवडणुका बिनविरोध झाल्या आहेत. कारखान्याच्या निवडणुकीसाठी अर्ज मागे घेण्याच्या शेवटच्या दिवशी गुरूवार १३ मार्च रोजी चित्र स्पष्ट झाले असून पाटील गटाचे २१ उमेदवार बिनविरोध निवडून आले आहेत. हर्षवर्धन पाटील त्यांनी १९९९ मध्ये नीरा भीमा सहकारी साखर कारखान्याची स्थापना केली होती. या कारखान्याने स्थापनेपासून चांगले कामकाज करीत गेल्या २५ वर्षांमध्ये शेतकऱ्यांचा विश्वास संपादन केलेला आहे. तसेच सध्या देशातील व राज्यातील साखर कारखानदारी अडचणीत असल्याची जाण शेतकऱ्यांना आहे. या पार्श्वभूमीवर कारखाना कार्यक्षेत्रातील ४६ गावांमधील सभासद, कार्यकर्ते, पदाधिकाऱ्यांनी बिनविरोध निवडणुकीसाठी सहकार्याची भूमिका घेतली, त्याबद्दल हर्षवर्धन पाटील यांनी आभार व्यक्त केले आहेत.
बिनविरोध विजयी झालेले उमेदवार :
बावडा गट– हर्षवर्धन शहाजीराव पाटील, प्रतापराव सर्जेराव पाटील, उमेश अच्युतराव पाटील. पिंपरी गट-प्रकाश शहाजी मोहिते, संजय तुळशीराम बोडके, विजय दत्तात्रय घोगरे, सुरवड गट-महेशकुमार दत्तात्रय शिर्के, दादासाहेब उत्तम घोगरे, सुभाष किसन गायकवाड, काटी गट– लालासाहेब देविदास पवार, राजकुमार वसंतराव जाधव, विलास रामचंद्र वाघमोडे, रेडणी गट-आनंदराव नामदेव बोंद्रे, राजेंद्र व्यंकट देवकर, दत्तू यशवंत सवासे. अनुसूचित जाती किंवा जमाती प्रवर्ग– राहुल अरुण कांबळे. इतर मागास प्रवर्ग- कृष्णाजी दशरथ यादव, भटक्या विमुक्त जाती व जमाती विशेष मागास प्रवर्ग– रामचंद्र नामदेव नाईक. ब वर्ग सभासद प्रवर्ग- भाग्यश्री हर्षवर्धन पाटील. महिला राखीव प्रवर्ग– संगीता दत्तात्रय पोळ, कल्पना निवृत्ती शिंदे.
या निवडणुकीसाठी निवडणूक निर्णय अधिकारी म्हणून उपजिल्हाधिकारी कल्याण पांढरे व त्यांना सहायक म्हणून इंदापूरचे तहसीलदार जीवन बनसोडे यांनी काम पाहिले.
