Ashok Kharat Case: नाशिकमधील स्वयंघोषित महाराज अशोक खरात याच्या काळ्या कारनाम्यांची चौकशी आता राजकीय नात्यांपर्यंत पोहोचली आहे. राज्य महिला आयोगाच्या माजी अध्यक्षा रुपाली चाकणकर यांची बहीण प्रतिभा चाकणकर यांना शिर्डी पोलिसांनी अधिकृत नोटीस बजावली आहे. समता पतसंस्थेतील कोट्यवधींच्या संशयास्पद आर्थिक उलाढालीप्रकरणी ही कारवाई करण्यात आली असून, त्यांना चौकशीसाठी पाचारण करण्यात आले आहे. या प्रकरणाच्या वाढत्या व्याप्तीमुळे राजकीय वर्तुळात मोठी खळबळ उडाली आहे.
तपासातील धक्कादायक खुलासे: 2 कोटी 40 लाखांचे कनेक्शन
शिर्डी पोलिसांनी केलेल्या तपासात आर्थिक व्यवहारांचे एक मोठे जाळे समोर आले आहे. समता पतसंस्थेत प्रतिभा चाकणकर आणि त्यांच्या मुलांच्या नावावर एकूण 4 खाती असल्याची माहिती निष्पन्न झाली आहे. या खात्यांमधून तब्बल 2 कोटी 40 लाख रुपयांचे मोठे व्यवहार झाले आहेत. हे पैसे नेमके कोणाचे आहेत आणि अशोक खरातच्या बेकायदेशीर सावकारी व्यवसायाशी या व्यवहारांचा काय संबंध आहे, याचा तपास पोलीस करत आहेत. पोलिसांनी चाकणकर यांच्या 2 वेगवेगळ्या पत्त्यांवर नोटीस पाठवली असून, 5 दिवसांच्या आत त्यांना शिर्डी पोलीस ठाण्यात हजर राहण्याचे आदेश दिले आहेत.
भोंदू बाबा खरातच्या कोठडीत वाढ; अत्याचाराचा गंभीर आरोप
दुसरीकडे, नाशिकमध्ये विशेष तपास पथकाने (SIT) अशोक खरातला न्यायालयात हजर केले असता, त्याच्या पोलीस कोठडीत 5 दिवसांची वाढ करण्यात आली आहे. खरातवर आतापर्यंत 12 गुन्हे दाखल झाले असून, एका 7 महिन्यांच्या गरोदर महिलेचे लैंगिक शोषण केल्याचा तिसरा गुन्हा अत्यंत गंभीर स्वरूपाचा आहे. मुलगा व्हावा आणि प्रसूती सुलभ व्हावी, असे आमिष दाखवून त्याने हे दुष्कृत्य केल्याचा आरोप पीडितेने केला आहे.
पतसंस्थांच्या माध्यमातून ‘मनी लॉड्रिंग’चा संशय
अशोक खरातने पतसंस्थांचा वापर काळा पैसा पांढरा करण्यासाठी केल्याचा पोलिसांना दाट संशय आहे. समता पतसंस्थेत खरात नॉमिनी असलेली 100 खाती आहेत, तर जगदंब पतसंस्थेत खरात नॉमिनी असलेली 32 खाती आढळली आहेत. यापूर्वीच अशोक खरातशी असलेल्या कथित संबंधांमुळे रुपाली चाकणकर यांनी आपल्या पदाचा राजीनामा दिला आहे. आतापर्यंत 33 खातेदारांचे जबाब नोंदवण्यात आले असून, प्रतिभा चाकणकर यांचा जबाब या प्रकरणात ‘टर्निंग पॉईंट’ ठरू शकतो.
