School Bus Fare : राज्यातील विद्यार्थ्यांच्या सुरक्षिततेसाठी आणि पालकांची आर्थिक पिळवणूक रोखण्यासाठी परिवहन विभागाने स्कूल बस नियमावलीत महत्त्वाचे बदल प्रस्तावित केले आहेत.
नव्या मसुद्यानुसार, आता स्कूल बसकडून आगाऊ शुल्क घेण्यास बंदी घालण्यात आली असून, केवळ मासिक स्वरूपातच भाडे आकारणे बंधनकारक केले जाणार आहे. यामुळे पालकांना मोठा दिलासा मिळणार आहे.
तसेच, विद्यार्थ्यांच्या सुरक्षिततेसाठी प्रत्येक स्कूल बसमध्ये ‘डिजिटल सेफ्टी मॉनिटरिंग सिस्टीम’ आणि ‘पॅनिक बटन’ बसवणे अनिवार्य करण्यात येणार आहे. याशिवाय व्हेईकल लोकेशन ट्रॅकिंग डिव्हाईस (GPS) आणि सीसीटीव्ही कॅमेरे बसवणेही बंधनकारक असेल. पालकांना मोबाईल अॅपच्या माध्यमातून आपल्या मुलाचे लोकेशन पाहता येणार आहे.
या सुधारित नियमांमध्ये सीट बेल्ट सक्ती, तसेच पूर्व-प्राथमिक ते पाचवीपर्यंतच्या विद्यार्थ्यांसाठी महिला अटेंडंट ठेवणे अनिवार्य करण्यात आले आहे. बसमधील सर्व कर्मचाऱ्यांची पोलीस पडताळणी आणि वैद्यकीय तपासणीही बंधनकारक असेल.
विद्यार्थ्यांच्या हालचालींची नोंद ठेवण्यासाठी डिजिटल हजेरी प्रणाली लागू केली जाणार असून, विद्यार्थी बसमध्ये कधी चढला आणि उतरला याची अचूक माहिती नोंदवली जाईल.
दरम्यान, शाळा परिवहन समितीला अधिक अधिकार देण्यात आले असून, बसचे शुल्क नियमानुसार घेतले जाते का यावर देखरेख ठेवण्याची जबाबदारी त्यांच्यावर असेल. तसेच पालकांच्या तक्रारींचे निवारण करून त्रैमासिक अहवाल सादर करणेही बंधनकारक करण्यात आले आहे.
या नियमांवर २४ एप्रिलपर्यंत हरकती आणि सूचना मागवण्यात आल्या असून, नियमांचे पालन न करणाऱ्या वाहनांवर परवाना रद्द करण्याची कठोर कारवाई केली जाणार आहे.
