Amravati Crime: नाशिकमधील भोंदू बाबा अशोक खरात प्रकरण ताजे असतानाच, अमरावती जिल्ह्यातील परतवाडा येथून अशाच प्रकारचा एक अत्यंत संतापजनक प्रकार समोर आला आहे. अनेक तरुणींना प्रेमाच्या जाळ्यात ओढून, त्यांचे अश्लील व्हिडिओ बनवून ब्लॅकमेल केल्याच्या आरोपाखाली मोहम्मद अयाज मोहम्मद तनवीर याला पोलिसांनी अटक केली आहे. न्यायालयाने आरोपीला सात दिवसांची (२१ एप्रिलपर्यंत) पोलीस कोठडी सुनावली आहे.
खासदार अनिल बोंडेंचा खळबळजनक दावा
भाजप खासदार अनिल बोंडे यांनी या प्रकरणाचा पर्दाफाश करताना गंभीर आरोप केले आहेत. त्यांच्या दाव्यानुसार, आरोपीने जवळपास १८० तरुणींचे लैंगिक शोषण केले असून त्याच्या मोबाईलमध्ये ३५० पेक्षा जास्त अश्लील व्हिडिओ सापडले आहेत. हे व्हिडिओ सोशल मीडियावर व्हायरल करून तो तरुणींना ब्लॅकमेल करत असल्याचेही समोर आले आहे.
सायबर विभागाकडून डेटा रिकव्हरी सुरू
पोलिसांनी आरोपीचा मोबाईल जप्त केला असून त्यात अनेक धक्कादायक व्हिडिओ आढळले आहेत. आरोपीने तपासाच्या भीतीने बराच डेटा डिलीट केला होता, जो आता सायबर तज्ज्ञांच्या मदतीने पुन्हा मिळवण्याचे (Recover) काम सुरू आहे. आरोपीने गेल्या एक वर्षापासून हा काळा धंदा सुरू असल्याची कबुली दिली असून, आतापर्यंत ७ पीडित मुलींची नावे निष्पन्न झाली आहेत. हा व्हिडिओ त्याने इतर कोणाला पाठवला का, याचाही शोध घेतला जात आहे.
पोलिसांच्या भूमिकेवर बोंडेंचा संताप
गेल्या तीन दिवसांपासून हे व्हिडिओ व्हायरल होत असतानाही पोलिसांनी स्वतःहून (Sumoto) कारवाई का केली नाही? असा संतप्त सवाल अनिल बोंडे यांनी उपस्थित केला आहे. पोलिसांनी त्वरित कठोर पावले न उचलल्यास पोलीस अधीक्षक कार्यालयासमोर आंदोलन करण्याचा इशाराही त्यांनी दिला आहे. अशोक खरातने ज्याप्रमाणे महिलांच्या श्रद्धेचा गैरफायदा घेऊन त्यांचे शोषण केले, तसाच काहीसा प्रकार इथेही घडल्याचे बोलले जात आहे. खरात प्रकरणाची चौकशी सध्या विशेष पोलीस पथकामार्फत सुरू असून अमरावतीच्या या घटनेने संपूर्ण राज्यात पुन्हा एकदा खळबळ उडाली आहे.
