Vedanta Power Plant Blast: छत्तीसगडमधील शक्ती जिल्ह्यातील सिंहितराई परिसरात आज दुपारी काळजाचा थरकाप उडवणारी दुर्घटना घडली. येथील ‘वेदांता पॉवर प्लांट’मध्ये दुपारी २ वाजेच्या सुमारास भीषण बॉयलर स्फोट झाला. या दुर्घटनेत १० कामगारांचा दुर्दैवी मृत्यू झाल्याची भीती व्यक्त केली जात असून, ४० हून अधिक कर्मचारी जखमी झाले आहेत.
स्फोटाचा भीषण थरार; कर्मचाऱ्यांची सैरावैरा धाव
नेहमीप्रमाणे प्लांटमध्ये कामाची लगबग सुरू असताना अचानक कानठळ्या बसवणारा आवाज झाला आणि संपूर्ण परिसर हादरला. स्फोटाची तीव्रता इतकी प्रचंड होती की, घटनास्थळी धुराचे काळे लोट पसरले आणि मोठ्या प्रमाणावर वित्तहानी झाली. मृत्यूसमोर पाहून कामगारांमध्ये एकच पळापळ सुरू झाली. स्फोटामुळे प्लांटमधील यंत्रसामुग्रीचेही मोठे नुकसान झाले आहे.
रेस्क्यू ऑपरेशन सुरू; जखमींची प्रकृती चिंताजनक
घटनेचा थरार समजताच स्थानिक प्रशासन, अग्निशमन दल आणि रुग्णवाहिका तातडीने घटनास्थळी रवाना झाल्या. जखमी झालेल्या ४० कर्मचाऱ्यांना तातडीने नजीकच्या रुग्णालयात दाखल करण्यात आले आहे. त्यापैकी काहींची प्रकृती गंभीर असल्याने मृतांचा आकडा वाढण्याची शक्यता वर्तवण्यात येत आहे. ढिगाऱ्याखाली अजूनही काही कामगार दबले असण्याची भीती असल्याने बचावकार्य युद्धपातळीवर राबवले जात आहे.
सुरक्षेबाबत प्रश्नचिन्ह; सखोल चौकशीचे संकेत
हा स्फोट तांत्रिक बिघाडामुळे झाला की सुरक्षा नियमांचे उल्लंघन केल्यामुळे, याचा तपास आता पोलीस प्रशासन करत आहे. मृतांच्या अधिकृत आकड्याबाबत जिल्हा प्रशासनाकडून अद्याप अंतिम स्पष्टीकरण येणे बाकी आहे. मात्र, या घटनेमुळे औद्योगिक क्षेत्रातील सुरक्षेचा प्रश्न पुन्हा एकदा ऐरणीवर आला असून प्लांटच्या सुरक्षा मानकांची कसून तपासणी केली जाणार आहे.
