Maharashtra Rain Alert : राज्यात येत्या काही दिवसांत हवामानात मोठा बदल होण्याची शक्यता असून २० ते २२ एप्रिलदरम्यान अनेक भागांत मेघगर्जनेसह वादळी पावसाचा अंदाज व्यक्त करण्यात आला आहे. विशेषतः पश्चिम महाराष्ट्रातील घाट परिसर, खान्देश, मराठवाडा आणि विदर्भातील काही भागांमध्ये दुपारनंतर ढगाळ वातावरण तयार होऊन जोरदार सरी कोसळू शकतात. या काळात विजांचा कडकडाट आणि काही ठिकाणी गारपीट होण्याचीही शक्यता हवामान विभागाने वर्तवली आहे.
१९ एप्रिल रोजी पश्चिम महाराष्ट्रातील घाट भाग, उत्तर खानदेश आणि दक्षिण मराठवाड्यात तुरळक ठिकाणी वादळी पावसाची शक्यता आहे. त्यानंतर २० आणि २१ एप्रिलला पावसाचा विस्तार वाढणार असून पुणे विभाग, दक्षिण मराठवाडा (छत्रपती संभाजीनगर परिसर) आणि अमरावती विभागातील काही भागांतही पावसाच्या सरी अपेक्षित आहेत.
दरम्यान, विदर्भात उष्णतेचा तडाखा कायम आहे. वर्धा येथे तापमानाने ४५ अंश सेल्सियसचा टप्पा गाठत या हंगामातील उच्चांक नोंदवला. नागपूरमध्ये ४४.२ अंश, अमरावतीत ४४.०, अकोला ४३.३, चंद्रपूर ४३.४, गोंदिया ४३.२ आणि यवतमाळ ४३.८ अंश तापमान नोंदवले गेले. उष्णतेमुळे नागरिक त्रस्त झाले असून रात्रीच्या तापमानातही वाढ झाल्याने उकाड्याची झळ कायम आहे.
नागपूरमध्ये किमान तापमान २७.४ अंश, तर वर्ध्यात २७.८ अंश नोंदवले गेले. त्यामुळे दिवसभर उष्णतेचा त्रास होत असल्याने दुपारच्या वेळेत बाहेर पडणे टाळावे, असा इशारा हवामान विभागाने दिला आहे.
पश्चिम विदर्भातील बुलढाणा, अकोला, अमरावती, वाशीम आणि यवतमाळ या जिल्ह्यांमध्येही मेघगर्जनेसह वादळी पावसाची शक्यता आहे. मात्र, नागपूर आणि पूर्व विदर्भात सध्या पावसाची शक्यता कमी आहे. पावसामुळे तापमानात काही प्रमाणात घट होण्याची शक्यता असून त्यामुळे नागरिकांना उकाड्यापासून थोडा दिलासा मिळू शकतो.
