Girish Mahajan Controversy : वरळी येथे भाजपच्या जन आक्रोश मोर्चादरम्यान वाहतूक कोंडीवरून राज्याचे जलसंपदा मंत्री गिरीश महाजन यांना जाब विचारणाऱ्या महिलेच्या अडचणीत वाढ झाली आहे. संबंधित महिलेविरोधात अखेर पोलिसांत तक्रार दाखल करण्यात आली आहे.
महिला आरक्षण विधेयकाच्या पार्श्वभूमीवर आयोजित या मोर्चामुळे वरळी परिसरात मोठी वाहतूक कोंडी निर्माण झाली होती. या कोंडीमुळे संतप्त झालेल्या एका महिलेने थेट मंत्री महाजन यांना “मोर्चा मोकळ्या मैदानात का नेत नाही?” असा सवाल करत पोलिसांनाही जाब विचारला होता.
या घटनेचा व्हिडिओ सोशल मीडियावर मोठ्या प्रमाणात व्हायरल झाला आणि अनेकांनी तिच्या धाडसाचे कौतुक केले, तर काहींकडून टीकाही झाली.
दरम्यान, आता वकील गुणरत्न सदावर्ते यांची मुलगी झेन सदावर्ते यांनी या महिलेविरोधात वरळी पोलीस ठाण्यात तक्रार दाखल केली आहे. शासकीय कामात अडथळा आणणे, सार्वजनिक शांतता भंग करणे आणि चेंगराचेंगरी घडवण्याचा प्रयत्न केल्याचा आरोप या तक्रारीत करण्यात आला आहे.
माध्यमांशी बोलताना झेन सदावर्ते यांनी “बंदोबस्तावर असलेल्या पोलीस अधिकाऱ्यांना शिवीगाळ करण्याचा अधिकार या महिलेला कोणी दिला?” असा सवाल उपस्थित केला. या तक्रारीनंतर आता पोलीस पुढे काय कारवाई करतात, याकडे सर्वांचे लक्ष लागले आहे.
