Accident News : बुलढाणा जिल्ह्यातील सिंदखेड राजा तालुक्यात मांडवा फाट्यावरील टी-पॉइंट वळणावर गुरुवारी (३० एप्रिल) सायंकाळी भीषण अपघात झाला. भरधाव दुचाकीने लोडिंग रिक्षाला दिलेल्या जोरदार धडकेत दुचाकीवरील दोघांचा मृत्यू झाला. या घटनेमुळे परिसरात शोककळा पसरली आहे.
मिळालेल्या माहितीनुसार, रोशन नांदुरकर (वय २९) आणि शुभम पांडुरंग वंजाळे (वय २८, रा. अंजनगाव सुर्जी, जि. अमरावती) हे पुण्याहून बुलढाण्यातील बिबी येथे लग्नासाठी आले होते. लग्न आटोपून ते दुचाकीने आपल्या गावी परतत असताना मलकापूर पांग्राकडून येणाऱ्या लोडिंग रिक्षाला त्यांच्या दुचाकीने (MH 27 BH 6276) जोरदार धडक दिली.
या अपघातात रोशन नांदुरकर यांचा जागीच मृत्यू झाला, तर गंभीर जखमी झालेल्या शुभम वंजाळे यांना तातडीने मलकापूर पांग्रा येथील प्राथमिक आरोग्य केंद्रात दाखल करण्यात आले. मात्र पुढील उपचारासाठी रुग्णवाहिकेतून नेत असताना वाटेतच त्यांचा मृत्यू झाला.
घटनेची माहिती मिळताच बिबी पोलीस ठाण्याचे अधिकारी आणि कर्मचारी घटनास्थळी दाखल झाले. स्थानिक नागरिकांनीही मदतकार्य केले.
दरम्यान, मलकापूर पांग्रा, बिबी आणि दुसरबीड टी-पॉइंट परिसरात दिशादर्शक फलकांचा अभाव असल्याने येथे वारंवार अपघात होत असल्याची तक्रार स्थानिकांनी केली आहे. या ठिकाणी तातडीने गतिरोधक व दिशादर्शक फलक बसवावेत, अशी मागणी नागरिकांकडून करण्यात येत आहे.
