जुन्नर (पुणे): नवऱ्याच्या घरी आपली महत्वाची कागदपत्रे मोबाइल परत घेण्याकरिता गेलेल्या पत्नी बरोबर नवरा व त्याच्या आईचे जोरदार वाद होऊन प्रापंचिक रागाच्या भरात त्याने कोयता, कुऱ्हाडीने हल्ला करुन निर्घृण हत्या केली. ही घटना जुन्नरच्या आदिवासी भागातील घंगाळदरे या गावात शुक्रवारी (दि. २१) भरदुपारी घडली. या प्रकरणी नवरा, त्याची आई यांच्या विरोधात गुन्हा दाखल करण्यात आला असून या घटनेतील आईला शनिवारी पोलिसांनी ताब्यात घेतले आहे.
अलका शंकर बांबळे, (वय ३३) असे खून झालेल्या विवाहितेचे नाव आहे. या प्रकरणी शंकर बारकू बांबळे, लिलाबाई बारकू बांबळे यांच्या विरोधात गुन्हा दाखल करण्यात आला आहे. घटनेची माहिती मिळताच पोलीस उपअधीक्षक रवींद्र चौधर, पोलिस निरीक्षक किरण अवचर यांनी घटनास्थळी भेट दिली.
शंकर व लिलाबाई या घटनेनंतर गावा लगतच्या घनदाट जंगलात पळून गेल्याची माहिती मिळाल्यानंतर सुमारे ५० पोलीस कर्मचाऱ्यांच्या मदतीने तसेच जुन्नर वन विभागाच्या ड्रोनच्या साहाय्याने जंगलात शोध मोहीम राबविण्यात आली. रात्री उशिरापर्यंत शोध मोहीम राबवूनसुद्धा हे दोघे सापडू शकले नाहीत. शनिवारी (दि.२२) लिलाबाई यांना सकाळी पोलीसांनी ताब्यात घेतले. तर शंकर हा अजूनही फरारी आहे. अलका ही प्रापंचिक रागामुळे नवऱ्या समवेत राहत नव्हती. घोडेगाव येथे ती राहत होती. शुक्रवारी ती काही महिलांना घेऊन घंगाळदरे येथे आपली महत्वाची कागदपत्रे व मोबाइल नवऱ्याच्या घरून घेऊन जाण्याकरिता आली होती. यावेळी तेथील घरामध्ये शंकर व लिलाबाई आणि अलका यांच्यात जोरदार वाद झाले. यावेळी रागाच्या भरात शंकरने कुऱ्हाड , कोयता घेऊन अलकाच्या शरीरावर वार केल्याने, ती गंभीर जखमी होऊन तिचा मृत्यू झाला.
या घटनेची खबर राजश्री विरणक (रा. मुलुंड मुंबई) यांनी जुन्नर पोलिसांना दिली. या घटनेच्या वेळी त्या स्वतः समक्ष हजर होत्या. घटना घडत असताना त्या आपल्या मोबाईलमध्ये चित्रीकरण करीत असल्याचे पाहून शंकर व त्याच्या आईने त्यांनाही मारण्याची धमकी दिली होती. या घटनेतील फरार आरोपीचा शोध सुरू असून पोलीस निरीक्षक किरण अवचर यांच्या मार्गदर्शनाखाली सहायक पोलिस निरीक्षक संदीप मोरे, अंमलदार विजय जंगम पुढील तपास करीत आहेत.
