Mumbai-Pune Expressway : मुंबई-पुणे एक्सप्रेसवेवरील मिसिंग लिंक परिसरात सोमवारी पहाटे भीषण अपघात झाला. कंटेनर, आयशर टेम्पो आणि इर्टिगा कार यांच्यात झालेल्या साखळी धडकेत दोन जणांचा जागीच मृत्यू झाला, तर चार जण गंभीर जखमी झाले आहेत. या अपघातामुळे मुंबईकडे जाणाऱ्या मार्गावरील वाहतूक सुमारे एक तास ठप्प झाली होती.
प्राथमिक माहितीनुसार, पहाटेच्या सुमारास तीन वाहने एकमेकांना धडकल्याने हा अपघात घडला. धडकेची तीव्रता इतकी मोठी होती की वाहनांचे मोठ्या प्रमाणात नुकसान झाले. अपघाताचे नेमके कारण अद्याप स्पष्ट झाले नसून पोलिसांकडून तपास सुरू आहे.
घटनेची माहिती मिळताच पोलीस, महामार्ग सुरक्षा पथक आणि बचाव यंत्रणा तातडीने घटनास्थळी दाखल झाली. जखमींना तत्काळ खोपोली नगरपालिका रुग्णालयात उपचारासाठी दाखल करण्यात आले असून त्यांच्यावर वैद्यकीय उपचार सुरू आहेत.
अपघातग्रस्त वाहने रस्त्याच्या कडेला हटवल्यानंतर वाहतूक हळूहळू पूर्ववत करण्यात आली. दरम्यान, पोलिसांनी घटनास्थळाचा पंचनामा करून अपघाताच्या कारणांचा शोध सुरू केला आहे. मृतांची ओळख पटवण्याचे काम सुरू असून मृतदेह शवविच्छेदनासाठी सरकारी रुग्णालयात पाठवण्यात आले आहेत.
या अपघातामुळे मुंबई-पुणे एक्सप्रेसवेवरील सुरक्षेचा मुद्दा पुन्हा एकदा चर्चेत आला असून वाहनचालकांना सावधगिरी बाळगण्याचे आवाहन करण्यात आले आहे.
