Pune Crime News : पुण्यातील वानवाडी परिसरात रविवारी पहाटे पोलिस आणि सराईत गुन्हेगारामध्ये थरारक गोळीबाराची घटना घडली. घरफोडीच्या गुन्ह्यात वॉण्टेड असलेल्या आरोपीला पकडण्याच्या कारवाईदरम्यान ही चकमक झाली असून, आरोपी आणि एक पोलीस अधिकारी दोघेही जखमी झाले आहेत.
वानवाडी परिसरात पहाटे सुमारे ५.३० ते ६.०० दरम्यान ही घटना घडली. पोलिसांना मिळालेल्या गोपनीय माहितीनुसार, ३० हून अधिक गंभीर गुन्ह्यांची नोंद असलेला सराईत गुन्हेगार परिसरात येणार असल्याची माहिती मिळाली होती. त्यानुसार पोलिसांनी सापळा रचून कारवाई सुरू केली.
पोलिसांनी आरोपीला घेरण्याचा प्रयत्न करताच त्याने स्वतःजवळील अग्निशस्त्रातून पोलिसांवर गोळीबार सुरू केला. अचानक झालेल्या या हल्ल्यामुळे परिसरात तणाव निर्माण झाला. परिस्थिती नियंत्रणाबाहेर जात असल्याचे पाहून पोलिस अधिकाऱ्याने स्वसंरक्षणार्थ प्रत्युत्तरादाखल गोळीबार केला.
या चकमकीत करण सिंग नावाचा सराईत गुन्हेगार जखमी झाला असून त्याला तातडीने पुण्यातील ससून रुग्णालयात दाखल करण्यात आले आहे. झटापटीदरम्यान एक पोलीस अधिकारीही किरकोळ जखमी झाला आहे.
घटनेनंतर परिसरात काही काळ तणावाचे वातावरण निर्माण झाले होते. पोलिसांनी संपूर्ण परिसर ताब्यात घेत पुढील तपास सुरू केला आहे. आरोपीच्या गुन्हेगारी पार्श्वभूमीची सखोल चौकशी करण्यात येत असून, वानवाडी पोलीस ठाण्यात संबंधित गुन्हा नोंदविण्याची प्रक्रिया सुरू आहे. या घटनेमुळे शहरातील गुन्हेगारी टोळ्यांवरील पोलिसांच्या कारवाईला वेग येण्याची शक्यता व्यक्त केली जात आहे.
