सोलापूर : उद्धव ठाकरेंच्या पक्षातील गळती सुरूच आहे. सोलापूर मधील करमाळा तालुक्याचे माजी आमदार जयवंतराव जगताप यांनी उद्धव ठाकरेंच्या शिवसेनेला रामराम ठोकत एकनाथ शिंदेच धनुष्यबाण हाती घेतलं आहे. जयवंतराव जगताप यांनी उपमुख्यमंत्री एकनाथ शिंदे यांच्या नेतृत्वाखाली शिवसेनेत प्रवेश केला असून, सोलापुरात ठाकरेंना मोठा धक्का बसल्याचं चित्र आहे.
दोन दिवसांपूर्वीच सांगलीतील पैलवान चंद्रहार पाटील यांनी शिंदे गटात प्रवेश करून ठाकरेंना मोठा धक्का दिला होता. तर काल (मंगळवार ९ जून) आणखी दोन निष्ठावंतांनी शिंदे गटात प्रवेश करत उद्धव ठाकरेंच्या शिवसेनेला रामराम ठोकला. अमरावतीतील दोन वेळचे आमदार ज्ञानेश्वर धाने पाटील आणि त्यांचा मुलगा युवासेना जिल्हाप्रमुख श्याम धाने पाटील यांनी आपल्या कार्यकर्त्यांसह शिंदे गटात प्रवेश केला.
अशातच आता सांगली, अमरावती पाठोपाठ सोलापुरातून देखील ठाकरेंना मोठा धक्का बसला आहे. काही दिवसांपूर्वी शिवसेना शिंदे गटाकडून उध्दव ठाकरे यांच्या गटातील खासदारांना आमदारांना आणि नगरसेवकांना फोडण्यासाठी ऑपरेशन टायगर सुरु करण्यात आले होते. याचे रिझल्ट आता यायला लागले असून, उद्धव ठाकरे गटातील निष्ठावान नेते एक-एक करून आता शिंदे गटात प्रवेश करत आहेत.
