पुणे : पोलीस भरतीची तयारी करणाऱ्या तरुणांसह तरुणींना पैलवानांनी धक्काबुक्की करत शिवीगाळ केल्याची घटना मंगळवारी (दि. १५) सकाळच्या सुमारास सहकारनगरमधील तळजाई मैदानावर घडली. या घटनेचा व्हिडिओ सोशल मीडियावर व्हायरल झाला असून, पैलवानांकडून तरुणांना मारहाण केल्याचे दिसून आले आहे. याप्रकरणी सहकारनगर पोलीस ठाण्यात गुन्हा दाखल करण्यात आला आहे.
पोलीस भरतीची तयारी करणारे १५० ते १७० तरुण-तरुणी दररोज तळजाई मैदानावर सरावासाठी जातात. मंगळवारी सकाळच्या सुमारास तरुण सराव करत होते. त्या वेळी मैदानाच्या मध्यभागी चौघे पैलवान थांबले होते. त्यांना भरतीची तयारी करणाऱ्या मुलांनी बाजूला होण्यास सांगितले. मात्र, त्यांनी बाजूला न होता, मुलांनाच धक्काबुक्की करत शिवीगाळ करण्यास सुरुवात केली. त्याच वेळी खात्यांतर्गत पीएसआय मैदानी परीक्षेचा सराव करणाऱ्या एका पोलीस अंमलदाराने मध्यस्थी करत भांडण मिटविण्याचा प्रयत्न केला. मात्र, तरीही पैलवानांनी त्यांनाही शिवीगाळ करत मारहाण केली. त्यानंतर साथीदारांना बोलावून घेतले.
पैलवानांच्या मदतीसाठी आलेल्या साथीदारांनीही तरुणांना बेदम मारहाण करत शिवीगाळ केली. त्याचवेळी मध्यस्थी करणाऱ्या शिक्षकाच्या डोक्यात दगड मारण्याचा प्रयत्नही केला. मात्र, काही तरुणींनी दगड हिसकावून घेतल्याने दुर्घटना टळली. पैलवानांनी तरुणींचा विनयभंग करत त्यांचीही छेडछाड केल्याचा आरोप भरतीचा सराव करणाऱ्या तरुणींनी केला आहे. मागील काही दिवसांपासून संबंधित पैलवानांकडून आमचा पाठलाग केला जात आहे. त्यांच्याकडून अश्लील शिवीगाळ करत टोमणे मारणे, मुद्दामहून मैदान परिसरात थांबल्याचाही आरोप काही तरुणींनी केला आहे.
