दिंडोरी: तालुका शिवसेना शिंदे गटाची बैठक माजी आमदार धनराज महाले यांच्या उपस्थितीत येथील शासकीय विश्रामगृह येथे पार पडली. आगामी जिल्हा परिषद व पंचायत समिती निवडणुकीच्या पार्श्वभूमीवर आयोजित करण्यात आलेल्या या बैठकीत पक्ष संघटन, राजकीय रणनीती आणि कार्यपद्धतीवर सविस्तर चर्चा झाली. मात्र, बैठकीत गटबाजीची धुसफूस आणि पदाधिकाऱ्यांविषयी नाराजीचा सूर प्रकर्षाने उमटला.
यावेळी बोलताना धनराज महाले म्हणाले, उपमुख्यमंत्री एकनाथ शिदे यांनी जनहिताचे अनेक निर्णय घेतले असून त्यांच्या नेतृत्वात अनेकजण शिवसेनेत काम करण्यास इच्छुक आहेत. त्यामुळे गटबाजी दूर करून पक्ष संघटना मजबूत करत सर्वांनी निवडणुकीच्या तयारीला लागावे.
तसेच महायुतीत लढायचे की नाही, याचा निर्णय पक्षश्रेष्ठी घेतील, मात्र प्रत्येक जागेसाठी सक्षम उमेदवारांची तयारी आतापासूनच हवी, असेही त्यांनी स्पष्ट केले. बैठकीस संपर्कप्रमुख सुनील पाटील, जिल्हाध्यक्ष भाऊलाल तांबडे, ज्येष्ठ नेते सुरेश डोखळे, मविप्र संचालक प्रवीण नाना जाधव, तालुकाप्रमुख किशोर कदम, युवा सेना जिल्हाप्रमुख वैभव महाले आदींसह अनेक पदाधिकारी व कार्यकर्ते उपस्थित होते. आभार ज्येष्ठ नेते सुरेश डोखळे यांनी मानले.
गटबाजी अन् एकत्र येण्याची भावना
बैठकीदरम्यान काही कार्यकर्त्यांनी गटबाजीचे स्पष्ट उल्लेख करत, शिवसेनेत अनेक इच्छुक कार्यकर्ते येऊ पाहत आहेत, मात्र, वरिष्ठ स्तरावरील एकजूट नसल्यामुळे स्थानिक पातळीवर पक्ष बळकट होत नाही, अशी खंत व्यक्त केली. काही कार्यकत्यांनी तालुक्यात राष्ट्रवादीचे दोन गट एकत्र येऊ शकतात, तर शिवसेनेचे गट का नाही? असा सवाल उपस्थित करत एकसंघतेची गरज अधोरेखित केली. मात्र, पक्षीय नेत्यांनी या मुद्द्यावर भाष्य करण्याचे टाळून, सर्वांनी एकत्र येऊन पक्ष संघटना वाढवण्याचे आवाहन केले.
पदाधिकाऱ्यांबाबत नाराजीचा सूर
बैठकीत काही ज्येष्ठ कार्यकर्त्यांनी नाराजी व्यक्त करत सांगितले की, पक्षात काही चुकीच्या व्यक्तीना प्रवेश दिला जात आहे आणि कार्यक्षम ज्येष्ठ कार्यकर्त्यांना विश्वासात घेतले जात नाही. तसेच, गावपातळीवर शाखा सुरु न झाल्याने संघटनात्मक बांधणी दुर्बल राहिली आहे, अशी टीका करण्यात आली. येत्या निवडणुकीत ही नाराजी कायम राहिल्यास पक्षाला फटका बसण्याची शक्यता कार्यकर्त्यांनी व्यक्त केली.
