नाशिक : नाशिक जिल्ह्यातील साक्री-शिर्डी महामार्गावर वनोली गावाजवळ झालेल्या भीषण अपघाताने संपूर्ण परिसरात खळबळ उडाली आहे. भरधाव दुचाकीने नंदुरबार-वसई मार्गावरील एसटी बसला समोरासमोर जोरदार धडक दिल्याने तिघा जिवलग मित्रांचा जागीच मृत्यू झाला. या अपघातामुळे घटनास्थळी तणावाचे वातावरण निर्माण झाले असून, सटाणा पोलिसांनी तपास सुरू केला आहे.
मिळालेल्या माहितीनुसार, हा अपघात साक्री-शिर्डी महामार्गावरील हॉटेल अधिराजजवळील तीव्र वळणावर घडला. नंदुरबार-वसई मार्गे ताहाराबादकडून येणारी एसटी बस आणि समोरून येणारी दुचाकी यांच्यात समोरासमोर धडक झाली. दुचाकीवरील चालकाचा वाहनावरील ताबा सुटल्याने ती थेट बसच्या पुढील चाकाखाली आली. या धडकेत दुचाकीवरील तिघेही गंभीर जखमी झाले आणि प्रचंड रक्तस्रावामुळे त्यांचा जागीच मृत्यू झाला. अपघात इतका भीषण होता की, दुचाकीचा अर्धा भाग एसटी बसच्या मशीनमध्ये अडकला होता.
मृत्यू झालेल्या तिघांचे नाव आणि इतर तपशील अद्याप पोलिसांनी जाहीर केलेले नाहीत, परंतु ते सर्व जिवलग मित्र असल्याची माहिती समोर आली आहे. सटाणा पोलिसांनी घटनास्थळी तातडीने धाव घेत मृतदेह ताब्यात घेतले आणि पंचनामा केला. अपघातामुळे साक्री-शिर्डी महामार्गावर काही काळ वाहतूक कोंडी झाली होती, परंतु पोलिसांनी त्वरित कारवाई करत वाहतूक सुरळीत केली. पोलिसांनी बसचालक आणि इतर साक्षीदारांचे जबाब नोंदवण्यास सुरुवात केली असून, अपघाताचे नेमके कारण शोधण्यासाठी तपास सुरू आहे.
महामार्गावरील अपघातांची मालिका
साक्री-शिर्डी महामार्गावर यापूर्वीही अनेक भीषण अपघात घडले आहेत. यापूर्वी 13 जानेवारी 2023 रोजी सिन्नर-शिर्डी महामार्गावर पाथरे गावाजवळ खाजगी बस आणि ट्रकच्या समोरासमोर धडकेत 10 जणांचा मृत्यू झाला होता. याशिवाय, 7 एप्रिल 2023 रोजी नाशिक-देवळा मार्गावर एसटी बसचा अपघात होऊन दोन जणांचा मृत्यू झाला होता. या महामार्गावरील तीव्र वळणे, एकेरी वाहतूक आणि वाहनांचा वेग यामुळे अपघातांचे प्रमाण वाढत असल्याची चिंता स्थानिकांनी व्यक्त केली आहे.
