पुणे : पुण्यातील टोळीयुद्ध पुन्हा एकदा चर्चेत आले असून, माजी नगरसेवक वनराज आंदेकर यांच्या खुनाचा बदला घेण्यासाठी झालेल्या १९ वर्षीय आयुष कोमकरच्या हत्येप्रकरणी पोलिसांनी मोठी कारवाई केली आहे. कुख्यात गुंड बंडू आंदेकरसह सहा जणांना पुणे पोलिसांच्या गुन्हे शाखेने अटक केली आहे. मात्र, या प्रकरणातील मास्टरमाइंड कृष्णा आंदेकर अद्याप फरार आहे.
५ सप्टेंबर २०२५ रोजी सायंकाळी नाना पेठेतील लक्ष्मी कॉम्प्लेक्सच्या पार्किंग लॉटमध्ये आयुष उर्फ गोविंद गणेश कोमकर (१९) याची अंदाधुंद गोळीबारात हत्या करण्यात आली. आयुष हा वनराज आंदेकर यांचा भाचा आणि बंडू आंदेकर यांचा नातू होता. ही हत्या वनराज आंदेकर यांच्या १ सप्टेंबर २०२४ रोजी झालेल्या खुनाचा बदला म्हणून झाल्याचा पोलिसांचा प्राथमिक अंदाज आहे. वनराज यांच्या खुनात आयुषचे वडील गणेश कोमकर हे प्रमुख आरोपी असल्याने हा बदला कुटुंबातच घेतल्याचे दिसून येते.
पोलिसांनी तातडीने कारवाई करत यश सिद्धेश्वर पाटील आणि अमित प्रकाश पाटोळे यांना शनिवारी (६ सप्टेंबर) रात्री १० वाजता अटक केली होती. या दोघांना कोर्टाने १२ सप्टेंबरपर्यंत पोलिस कोठडी सुनावली आहे. आता आणखी सहा जणांना अटक करण्यात आली असून, त्यात बंडू आंदेकर, त्यांची मुलगी, दोन नातवंडे, शूटर अमन पठाण, स्वराज वाडेकर आणि तुषार वाडेकर यांचा समावेश आहे.
गुन्ह्याचा उलगडा आणि आरोपी
पोलिस तपासात समोर आले की, आयुषवर ११ ते १२ गोळ्या झाडण्यात आल्या, ज्यामुळे तो जागीच ठार झाला. घटनास्थळावरून १२ रिकाम्या काडतुसे आणि एक जिवंत काडतूस जप्त करण्यात आले आहे. सीसीटीव्ही फुटेजमध्ये अमन पठाण आणि यश पाटील यांनी आयुषवर गोळीबार केल्याचे स्पष्ट झाले आहे, तर अमित पाटोळे आणि सुजल मिरगू हे हल्ल्याच्या वेळी जवळच उपस्थित होते.
या प्रकरणात बंडू आंदेकरसह एकूण १३ जणांवर समर्थ पोलिस ठाण्यात आयुषच्या आईच्या तक्रारीवरून खुन आणि कट रचल्याचा गुन्हा दाखल करण्यात आला आहे. यात कृष्णा आंदेकर, शिवम आंदेकर, शिवराज आंदेकर, अभिषेक आंदेकर, लक्ष्मी आंदेकर, स्वराज वाडेकर, तुषार वाडेकर, वृंदावनी वाडेकर, अमन युसूफ पठाण, यश पाटील, अमित पाटोळे आणि सुजल मेरगू यांचा समावेश आहे. सर्वांवर भारतीय न्याय संहितेच्या कलम १०३(१), ६१(२), ३(५) आणि आर्म्स अॅक्टच्या संबंधित कलमांखाली गुन्हा दाखल आहे.
मास्टरमाइंड कृष्णा आंदेकर फरार
पोलिसांनी गणेशोत्सव आणि आयुषच्या अंत्यसंस्कारादरम्यान शांतता राखत आरोपींवर पाळत ठेवली होती. त्यानंतर बंडू आंदेकरसह सहा जणांना अटक करण्यात यश आले. मात्र, या हत्येचा मास्टरमाइंड मानला जाणारा कृष्णा उर्फ कृष्णराज आंदेकर अद्याप फरार आहे. पोलिस त्याचा शोध घेत असून, त्याच्यासह इतर फरार आरोपींना लवकरच ताब्यात घेण्याचा दावा करत आहेत.
