Nashik Crime: नाशिक जिल्ह्याच्या त्र्यंबकेश्वरमध्ये आज इलेक्ट्रॉनिक मीडियाच्या पत्रकारांवर हल्ला झाल्याची धक्कादायक बातमी समोर येत आहे. स्वामी समर्थ केंद्राजवळील कमानी परिसरात गाड्यांच्या प्रवेशासाठी पावती घेणाऱ्या काही व्यक्तींनी पत्रकारांवर अचानक हल्ला केला. या हल्ल्यात तीन ते चार पत्रकार गंभीर जखमी झाले असून सध्या त्यांच्यावर त्र्यंबकेश्वरच्या शासकीय रुग्णालयात उपचार सुरू आहेत. प्राथमिक माहितीनुसार, एक पत्रकार गंभीर अवस्थेत असल्याने त्याला पुढील उपचारासाठी नाशिकच्या अपोलो हॉस्पिटलमध्ये हलवण्यात आले आहे.
घटनेनंतर त्र्यंबकेश्वर पोलीस ठाण्याचे पथक घटनास्थळी दाखल झाले असून त्यांनी तपास सुरू केला आहे. पत्रकार संघटना या घटनेवर निषेध व्यक्त करत आहेत आणि दोषींवर कठोर कारवाई करण्याची मागणी करत आहेत. दरम्यान, राज्याचे अन्न, नागरी पुरवठा व ग्राहक संरक्षण मंत्री छगन भुजबळ यांनी या प्रकरणाचा निषेध नोंदवत जखमी पत्रकारांच्या तब्येतीची चौकशी केली.
छगन भुजबळ यांनी दोषींवर कडक कारवाई करण्याच्या सूचना दिल्या आहेत. तसेच जलसंपदा आणि आपत्ती व्यवस्थापन मंत्री गिरीश महाजन देखील आज रात्री नाशिकमध्ये दाखल होणार असून ते जखमी पत्रकारांची भेट घेऊन परिस्थितीची पाहणी करतील. या घटनेमुळे पत्रकारितेच्या सुरक्षिततेवर प्रश्न निर्माण झाला असून स्थानिक प्रशासन आणि पोलिसांकडून दोषींविरोधात तातडीची कारवाई करण्याची अपेक्षा व्यक्त केली जात आहे.
