मुंबई: अंगणवाडी सेविका आणि मदतनीस यांना राज्य सरकारकडून दिवाळीनिमित्त मोठी भेट जाहीर करण्यात आली आहे. महिला व बालविकास मंत्री आदिती तटकरे यांनी सांगितले की, या कामगारांना यंदा दोन हजार रुपयांचा बोनस भाऊबीज म्हणून देण्यात येणार आहे. यासाठी तब्बल 40.61 कोटी रुपयांचा निधी राज्य सरकारने मंजूर केला आहे.
लहान मुलांची देखभाल, त्यांचे पोषण व सर्वांगीण विकास यासाठी काम करणाऱ्या अंगणवाडी सेविका आणि मदतनीस यांच्या कार्याचा गौरव करण्यासाठी हा निर्णय घेण्यात आल्याचे तटकरे यांनी स्पष्ट केले. प्रत्येक अंगणवाडी सेविका आणि मदतनीस ही आपल्या समाजातील एक शक्ती आहे. त्यामुळे त्यांचा सण अधिक आनंदात साजरा व्हावा हीच आमची भूमिका आहे, असं आदिती तटकरे यांनी म्हटलं आहे.
हेही वाचा – रेल्वे कर्मचाऱ्यांसाठी आनंदाची बातमी! 11 लाख रेल्वे कर्मचाऱ्यांना मिळणार दिवाळी बोनस
भाऊबीजेची ही रक्कम एकात्मिक बाल विकास सेवा आयुक्त कार्यालयामार्फत वितरित केली जाणार असून, जिल्हाधिकारी, प्रकल्प अधिकारी आणि संबंधित अधिकारी यांच्या देखरेखीखाली ती लाभार्थ्यांच्या खात्यात जमा होईल. मिळालेल्या माहितीनुसार, ऑक्टोबरच्या पहिल्या दोन आठवड्यांतच हा बोनस मिळण्याची शक्यता आहे. राज्य सरकारच्या या निर्णयामुळे अंगणवाडी सेविका आणि मदतनीस महिलांची दिवाळी यंदा गोड होणार आहे.
