Car Accident 5 Dead : दिल्ली-जयपूर महामार्गावरील गुरूग्राममधील झाडसा चौकात एक भीषण अपघात घडला. भरधाव वेगात असलेली चारचाकी गाडी चालकाच्या नियंत्रणातून सुटून थेट दुभाजकावर आदळली. या धक्कादायक अपघातात कारमधील सहापैकी पाच जणांचा मृत्यू झाला, तर एक जण गंभीर जखमी अवस्थेत आहे. ही घटना शनिवारी (२७ डिसेंबर २०२५) पहाटे ४:३० च्या सुमारास घडली असून परिसरात खळबळ उडाली आहे.
पोलिसांनी दिलेल्या माहितीनुसार, दिल्लीहून गुरूग्रामच्या दिशेने निघालेल्या या कारमध्ये तीन तरुण आणि तीन तरुणी असे एकूण सहा प्रवासी होते. अपघात इतका भीषण होता की, कार पूर्णपणे चक्काचूर झाली. प्रत्यक्षदर्शींनी सांगितल्यानुसार, वाहनाचा वेग प्रचंड होता, आणि चालकाचे नियंत्रण सुटल्याने गाडी दुभाजकावर आदळली.
या अपघातात दोन तरुण आणि दोन तरुणींचा जागीच मृत्यू झाला, तर एका तरुणीचा रुग्णालयात उपचारादरम्यान मृत्यू झाला. एक तरुण गंभीर जखमी असून, त्याच्यावर खासगी रुग्णालयात उपचार सुरू आहेत. अपघाताची माहिती मिळताच पोलिसांनी घटनास्थळी धाव घेतली आणि मृतदेहांना शवविच्छेदनासाठी रुग्णालयात पाठवले. सध्या पोलिस मृतांची ओळख पटवण्याचा प्रयत्न करत असून, अपघाताच्या कारणांचा तपास सुरू आहे.
या घटनेमुळे दिल्ली-जयपूर महामार्गावरील वाहतूक काही काळ विस्कळीत झाली. स्थानिक नागरिक आणि प्रवाशांमध्ये या दुर्घटनेमुळे भीतीचे वातावरण पसरले आहे. पुढील तपासात अपघाताचे नेमके कारण समोर येईल.
