उमरखेड (यवतमाळ): भावासह जात असलेल्या महिलेला दोन भामट्यांनी वाटेत अडविले. त्यानंतर महिलेचा विनयभंग करीत दोघांनाही बेदम मारहाण केली. शिवाय महिलेच्या गळ्यातील ४० हजार रुपये किमतीची सोन्याची साखळी हिसकावून पळ काढला. ही घटना २० डिसेंबरला रात्री टाकळी मार्गावर घडली. घटनेनंतर पोलिसांनी एका आरोपीला बेड्या ठोकल्या असून दुसरा पसार होण्यात यशस्वी झाला आहे.
पीडित महिला २० डिसेंबरला रात्री ती मानलेला भाऊ बबन भाग्यवंत याच्यासोबत उमरखेडवरून टाकळीला जात होती. दरम्यान आरोपी कृष्णा तोंडारे व विजय भिमेवार (दोघेही रा. शिवाजी वॉर्ड, उमरखेड) यांनी त्यांना रस्त्यात अडवून मारहाण केली. तसेच पन्नास हजार रुपयांची मागणी केली. पैसे न दिल्यास ठार मारण्याची धमकी दिली. एवढ्यावरच ते थांबले नाही तर त्यांनी महिलेसह तिच्या भावाला मारहाण केली. त्यानंतर पीडित महिलेने प्रसंगावधान राखून मुलाला बोलाविले. तेव्हा त्यालाही आरोपीनी मारहाण केली. शिवाय महिलेच्या गळ्यातील ४० हजारांची सोन्याची चैन हिसकावून ते दुचाकीने भरधाव पसार झाले.
या घटनेची तक्रार प्राप्त होताच स्थानिक पोलिसांनी दोन्ही आरोपींविरुद्ध गुन्हा दाखल केला. त्यानंतर स्थानिक गुन्हे शाखा, आरसीपी व स्थानिक पोलिसांच्या पथकाने त्यातील आरोपी कृष्णा तोंडारे यास अटक केली. मात्र त्याचा साथीदार विजय भीमनवार हा पसार होण्यात यशस्वी झाला आहे. या घटनेचा अधिक तपास उपविभागीय पोलीस अधिकारी हनुमंत गायकवाड व ठाणेदार शंकर पांचाळ यांच्या मार्गदर्शनात पोलीस करीत आहेत.
