पुणे : पुण्यातील जैन बोर्डिंग हाऊसच्या वादग्रस्त जमीनविक्री व्यवहाराला अखेर पूर्णविराम लागला असून, बिल्डर विशाल गोखले यांनी हा करार रद्द केला आहे. या घटनेच्या पार्श्वभूमीवर शिवसेना (शिंदे गट) नेते आणि माजी आमदार रविंद्र धंगेकर यांनी एका मराठी वृत्तवाहिनीशी बोलताना उपमुख्यमंत्री एकनाथ शिंदे यांच्या शब्दांची पूर्तता झाल्याचे सांगितले.
रवींद्र धंगेकर यांनी भाजप खासदार आणि केंद्रीय राज्यमंत्री मुरलीधर मोहोळ यांच्यावर जोरदार हल्लाबोल केला असून, “दोन दिवसांत व्यवहार रद्द झाला तर मोहोळांसह सर्वांना जिलेबी भरवणार” अशी धमकी दिली आहे. या प्रकरणाने महायुतीत तणाव वाढला असून, धंगेकर यांनी पंतप्रधान नरेंद्र मोदी यांना पत्र लिहून मोहोळ यांच्या राजीनाम्याची मागणी केली आहे.
रविंद्र धंगेकर यांनी सांगितले की, “एकनाथ शिंदे यांनी सांगितलं होतं की दोन दिवसांत तोडगा निघेल. त्याप्रमाणे दोन दिवसांतच जैन बोर्डिंगचा व्यवहार पूर्णपणे रद्द झाला. मी आता आनंदी आहे. पुढील दोन दिवस मोहोळांबद्दल मी काही बोलणार नाही. पण व्यवहार रद्द झाल्याने मोहोळांसह सर्वांना मी जिलेबी भरवणार.” धंगेकर यांनी शिंदे यांच्या हस्तक्षेपाचे कौतुक केले असून, “शिंदे साहेबांनी दिलेला शब्द खरा ठरला” असे म्हटले.
जैन बोर्डिंग प्रकरणात धंगेकर यांनी मोहोळ यांच्यावर अनेक गंभीर आरोप केले होते. २० ऑक्टोबरला त्यांनी सोशल मीडियावर पोस्ट करत म्हटले होते, “या लोकांनी जैन मंदिर गहाण ठेवलं, जमिनी व देव खाल्ला. मुरलीधर मोहोळ हे पुण्यातील जैन बोर्डिंग हाऊसच्या जमिनीच्या गैरव्यवहार प्रकरणात दोषी आहेत.” २३ ऑक्टोबरला त्यांनी आणखी एक व्हिडिओ शेअर करत म्हटले, “मुरलीधर मोहोळ महापौर असताना बिल्डरची गाडी वापरत असत.
हे सर्व योगायोग नाही, मी पुरावा देईन.” २५ ऑक्टोबरला धंगेकर यांनी पंतप्रधान मोदींना पत्र लिहून मोहोळ यांच्या राजीनाम्याची मागणी केली असून, “मोहोळांच्या सत्तेच्या दुरुपयोगाने हा घोटाळा झाला. तपास होईपर्यंत राजीनामा द्यावा” असे म्हटले. याशिवाय, “या लोकांनी जैन मंदिर वर कर्ज ठेवले, देवाची जमीन खाल्ला” अशी टीका केली.
