Turkey Earthquake : तुर्कीच्या पश्चिम भागात सोमवारी रात्री ६.१ तीव्रतेच्या शक्तिशाली भूकंपाने हाहाकार माजवला. भूकंपाचे केंद्र बालिकेसिर प्रांतातील सिंडिरगी शहर असून, स्थानिक वेळेनुसार रात्री १०:४८ वाजता (१९४८ GMT) केवळ ५.९९ किलोमीटर खोलीवर हे हादरे बसले. भूकंपामुळे तीन इमारती कोसळल्या, विजेची पूर्णपणे खंड पडला आणि जीव वाचवण्यासाठी नागरिकांनी घराबाहेर धाव घेतली. रस्त्यावर एकच गोंधळ उडाला. या थरारक घटनेचे व्हिडिओ सोशल मीडियावर व्हायरल झाले असून, भूकंपाची तीव्रता स्पष्ट दिसत आहे.
सुदैवाने या भूकंपात आतापर्यंत कोणतीही जीवितहानी झालेली नाही. काही नागरिकांना किरकोळ दुखापत झाल्याची माहिती आहे. भूकंपाचे धक्के बुर्सा, मनिसा, इझमीर आणि इस्तंबूलसह अनेक प्रांतांत जाणवले. हादरे जाणवताच लोकांनी घर सोडून रस्त्यावर पळ काढला. अनेकांनी रात्र घराबाहेरच काढली, कारण आफ्टरशॉक्सची भीती कायम होती. या संकटात जोरदार पावसाने भर टाकली, ज्यामुळे परिस्थिती आणखी बिकट झाली.
स्थानिक अधिकाऱ्यांनी तातडीने प्रतिसाद देत मशिदी, शाळा आणि क्रीडा हॉल नागरिकांसाठी आश्रयस्थान म्हणून उघडले. विजपुरवठा खंडित झाल्याने अंधारातच मदतकार्य सुरू आहे. तुर्कीच्या आपत्ती व्यवस्थापन प्राधिकरण (AFAD) ने खबरदारीचा इशारा दिला असून, नागरिकांना सतर्क राहण्याचे आवाहन केले आहे. भूकंपग्रस्त भागातील परिस्थितीवर लक्ष ठेवले जात आहे.
