Pune Cyber Crime: पुणे शहरात सायबर चोरट्यांनी आता वाहतूक नियमांच्या नावाखाली नागरिकांना लुटण्यास सुरुवात केली आहे. टिळक रस्ता परिसरातील एका व्यक्तीला ‘वाहतुकीचा नियम मोडला आहे’ असा बनावट मेसेज पाठवून तब्बल २ लाख ७५ हजार रुपयांचा गंडा घालण्यात आला आहे. आरटीओच्या नावाने आलेल्या या बनावट मेसेजमुळे सर्वसामान्य नागरिकांमध्ये भीतीचे वातावरण असून, सायबर सुरक्षिततेचा प्रश्न पुन्हा एकदा ऐरणीवर आला आहे.
सायबर चोरट्यांची नेमकी ‘मोडस ऑपेरंडी’
विश्रामबाग पोलिसांनी दिलेल्या माहितीनुसार, या प्रकरणातील पीडित व्यक्तीच्या मोबाईलवर आरटीओकडून आल्याचे भासवणारे एक ‘चलान नोटिफिकेशन’ आले होते. या मेसेजसोबत एक फाईल जोडलेली होती, जी अधिकृत सरकारी कागदपत्र असल्याचा भास निर्माण करत होती. तक्रारदाराने ती फाईल डाऊनलोड करून उघडताच त्यांचा मोबाईल हॅक झाला. चोरट्यांनी मालवेअरच्या माध्यमातून मोबाईलचा ताबा मिळवला आणि काही वेळातच त्यांच्या बँक खात्यातून मोठी रक्कम लंपास केली.
‘मालवेअर’चा नवा सापळा
सध्या पुणे शहरात अशा प्रकारच्या फसवणुकीचे प्रमाण वाढले असून चोरटे केवळ ट्रॅफिक चालानच नाही, तर इतर विविध क्लृप्त्या वापरत आहेत. यामध्ये प्रामुख्याने थकीत वीज बिल भरणे, गॅस कनेक्शन कापले जाण्याची भीती दाखवणे किंवा बँक केवायसी (KYC) अपडेट करण्याच्या नावाखाली घातक ‘मालवेअर’ फाईल्स पाठवल्या जात आहेत. एकदा का ही फाईल मोबाईलमध्ये डाऊनलोड झाली, की युजरचा सर्व डेटा आणि बँकिंग माहिती चोरट्यांच्या हाती लागते.
सुरक्षित राहण्यासाठी पोलिसांचे आवाहन
या प्रकरणाचा अधिक तपास विश्रामबाग पोलीस ठाण्याचे पोलीस निरीक्षक अरुण घोडके करत आहेत. पोलिसांनी नागरिकांना सतर्क राहण्याचे आवाहन केले असून, अधिकृत सरकारी कामांसाठी किंवा चलान भरण्यासाठी नेहमी अधिकृत संकेतस्थळांचा किंवा ॲप्सचाच वापर करण्याचा सल्ला दिला आहे. अनोळखी लिंकवर क्लिक करणे किंवा संशयास्पद फाईल्स डाऊनलोड करणे आर्थिक सुरक्षिततेसाठी धोक्याचे ठरू शकते, असे पोलिसांनी स्पष्ट केले आहे.
