सोलापूर: मंगळवारी सोलापूर जिल्ह्यातील बार्शी तालुक्यात एक धक्कादायक घटना उघडकीस आली होती. 38 वर्षीय व्यापारी गोविंद जगन्नाथ बर्गे हे त्यांच्या कारमध्ये मृतावस्थेत आढळले होते. त्यांच्या डोक्यात गोळी लागलेली होती. ही कार सासुरे गावच्या परिसरात उभी असल्याची माहिती स्थानिकांनी वैराग पोलिसांना दिल्यानंतर तपासाला सुरुवात झाली. घटनास्थळावरून एक पिस्तूल जप्त करण्यात आले असून सुरुवातीला ही आत्महत्या असल्याचे मानले गेले होते. मात्र, पुढील तपासात प्रकरणाला वेगळे वळण लागले आहे.
पोलिसांनी दिलेल्या माहितीनुसार, मृत गोविंद बर्गे हे बीड जिल्ह्यातील रहिवासी असून विवाहित होते. त्यांना दोन मुले आहेत. बर्गे यांचे सासुरे गावातील रहिवासी पूजा देवीदास गायकवाड हिच्याशी प्रेमसंबंध होते. पूजा ही पारगाव कला केंद्राशी संबंधित लावणी नृत्यांगना आहे. तपासात समोर आले की, बर्गे यांनी तिला अडीच लाख रुपयांचे सोन्याचे दागिने आणि मोबाईल फोन भेट दिला होता. परंतु अलीकडे त्यांच्यात सतत वाद होत होते. सोमवारी रात्री बर्गे गाडीने पूजाच्या घरी गेले होते.
दरम्यान, या प्रकरणात बर्गे यांचा मेहुणा लक्ष्मण जगन्नाथ चव्हाण यांनी वैराग पोलिसांकडे औपचारिक तक्रार दाखल केली आहे. तक्रारीत त्यांनी गंभीर आरोप करताना म्हटले की, पूजा गायकवाड वारंवार गोविंदला पैशांसाठी ब्लॅकमेल करत होती आणि बलात्काराचा गुन्हा दाखल करण्याची धमकी देत होती. या सततच्या छळामुळे बर्गे मानसिक तणावाखाली होते आणि त्यामुळेच त्यांनी टोकाचे पाऊल उचलले असावे.
या तक्रारीच्या आधारे पोलिसांनी पूजा गायकवाडला आत्महत्येस प्रवृत्त केल्याच्या आरोपाखाली अटक केली आहे. तथापि, पोलिस आता आत्महत्येसह हत्येच्या शक्यतेचाही तपास करत आहेत. या घटनेमुळे परिसरात खळबळ उडाली असून तपास पूर्ण होईपर्यंत अनेक महत्त्वाचे धागेदोरे उलगडण्याची शक्यता आहे.
